Strategaeth Tai ar gyfer Sir Conwy i'w thrafod gan Gynghorwyr

Strategaeth Tai ar gyfer Sir Conwy i'w thrafod gan Gynghorwyr

Gofynnir i Gynghorwyr Cyngor Bwrdeistref Sirol Conwy ystyried Strategaeth Tai a Digartrefedd Ddrafft ar gyfer 2026 i 2031 mewn cyfarfodydd dros yr ychydig wythnosau nesaf, a rhoi caniatâd ar gyfer ymgynghoriad â'r cyhoedd.

Mae'r Strategaeth yn nodi'r weledigaeth i sicrhau bod, “gan bobl yng Nghonwy fynediad at lety fforddiadwy ac addas o safon uchel sy’n gwella safon eu bywyd, a bod digartrefedd yn brin, yn fyr a ddim yn cael ei ailadrodd.”

Mae'n amlinellu cynllun pum mlynedd i fynd i'r afael â'r heriau tai sy'n wynebu Sir Conwy, atal digartrefedd, a helpu i greu cymunedau cynaliadwy.  Mae'r nodau hyn ar gyfer tai wrth wraidd un o nodau Cynllun Corfforaethol y Cyngor.

Mae'r Strategaeth ar gyfer 2026–2031 yn adeiladu ar gyflawniadau sylweddol fersiwn flaenorol y Cyngor a gefnogwyd, dros gyfnod y pum mlynedd diwethaf, gyda dros £65 miliwn a sicrhawyd o Grant Tai Cymdeithasol Llywodraeth Cymru.  Defnyddiwyd y cyllid hwn i ddatblygu tai fforddiadwy newydd.  Bu'r Cyngor yn gweithio mewn partneriaeth â landlordiaid cymdeithasol cofrestredig a budd-ddeiliaid allweddol eraill i ddarparu'r cartrefi hyn, gan sicrhau datblygiadau cynaliadwy o ansawdd uchel sy'n diwallu anghenion tai lleol.

Yn ogystal, rhwng 2018/19 a 2024/25, daethpwyd â 294 o eiddo gwag yn ôl i ddefnydd, a gwnaed 56 ohonynt ar gael i deuluoedd sydd angen cartrefi fforddiadwy, a chefnogwyd dros 3,000 o aelwydydd gan dîm tai profiadol y Cyngor a'i bartneriaid i atal neu ddatrys digartrefedd.  Roedd addasiadau tai a wnaed i 713 o eiddo hefyd yn golygu bod preswylwyr ag anableddau yn gallu aros yn eu cartrefi.

Nawr, mae'r Strategaeth ar gyfer 2026–2031 yn nodi blaenoriaethau allweddol i barhau â'r gwaith hwn.  Bydd pum cynllun yn cefnogi'r strategaeth: ymdrechu i wneud y mwyaf o argaeledd tai fforddiadwy; defnyddio’r adnodd coll o gartrefi gwag unwaith eto; defnyddio Grant Cymorth Tai Llywodraeth Cymru i ddarparu cymorth wedi'i dargedu i'r rhai sydd mewn perygl o fod yn ddigartref ac i wella mynediad at wasanaethau cefnogaeth; gweithio ar gyflenwad tai'r sector preifat; ac atal digartrefedd.  Bydd Cynlluniau Gweithredu yn monitro cynnydd ac yn ysgogi cyflawni'r Strategaeth.

Dywedodd y Cynghorydd Stephen Price, yr Aelod Cabinet Tai, “Mae mynediad at gartrefi diogel a fforddiadwy ledled Sir Conwy yn hanfodol i iechyd, lles a gwytnwch cymunedol. Mae'r strategaeth hon yn nodi sut y byddwn yn gweithio gyda phartneriaid i gyflawni newid gwirioneddol i bobl yng Nghonwy.”

Mae'r Strategaeth wedi'i llunio gyda mewnbwn gan amrywiaeth o sefydliadau partner gan gynnwys Landlordiaid Cymdeithasol Cofrestredig, landlordiaid preifat, ac, yn bwysicaf oll, gydag adborth gan unigolion a theuluoedd sy'n rhannu eu profiadau o dai a digartrefedd.  Os bydd Cynghorwyr yn cymeradwyo'r Strategaeth Ddrafft, gofynnir i'r cyhoedd roi eu barn ar y ddogfen mewn ymgynghoriad.

Bydd y Strategaeth Ddrafft yn cael ei thrafod yn y Pwyllgor Trosolwg a Chraffu Economi a Lle ar 21 Ionawr 2026 (Democratiaeth Lleol Conwy : Agenda ar gyfer Pwyllgor Trosolwg a Chraffu Economi a Lle Dydd Mercher 21 Ionawr 2026, 5.30 pm), ac yna'r Cabinet ar 27 Ionawr 2026 (Democratiaeth Lleol Conwy : Agenda ar gyfer Y Cabinet Dydd Mawrth 27 Ionawr 2026, 2.00 pm), ac os cytunir, bydd yr ymgynghoriad â'r cyhoedd yn digwydd yn y misoedd nesaf.

Gellir dod o hyd i ragor o wybodaeth am dai, a'r gwasanaethau a'r gefnogaeth y gall Tîm Tai'r Cyngor eu darparu, ar wefan y Cyngor Tai - Cyngor Bwrdeistref Sirol Conwy.