Masnachwr yn Euog trwy Ymhoniad Anwir

Masnachwr yn Euog trwy Ymhoniad Anwir

Yn Llys y Goron Caernarfon ar 15 Ebrill 2026, plediodd Joseph Thomas sy’n masnachu fel C & J Roofing and Building yn euog i Adran 2 Deddf Twyll 2006, sef twyll trwy ymhoniad anwir.

Yn 2024, fe gysylltodd dyn mewn oed o Lanelian â Mr Thomas, yn gofyn iddo wneud gwaith trwsio ar y cwteri tu allan.  Fe fynnodd Joseph Thomas fod amryw o bethau eraill angen eu gwneud hefyd: cael gwared ar eiddew, torri coed a gosod ffens ar ochr yr eiddo.

Fe fynnodd Mr Thomas daliad o £17,000 am y gwaith - sieciau am £5,000 a £7,000, a throsglwyddiad banc o £5,000. Roedd y dioddefwr 84 mlwydd oed yn teimlo bod yn rhaid iddo dalu.

Ar ôl derbyn cwyn, fe ddefnyddiodd Safonau Masnach Conwy arolygwr annibynnol i asesu’r gwaith a rhoi pris o faint ddylai’r gwaith fod wedi’i gostio.  Daeth adroddiad yr arolygwr annibynnol i’r casgliad mai £6432.56 ddylai’r gwaith a wnaed fod wedi’i gostio, gan olygu fod y dioddefwr wedi gor-dalu £10,567.44.

Cafodd yr achos ei ohirio er mwyn paratoi adroddiad cyn dedfrydu, ac mae dyddiad ar gyfer dedfrydu wedi’i drefnu ar gyfer 21 Mai 2026.

Meddai Rheolwr Gwarchod y Cyhoedd Cyngor Bwrdeistref Sirol Conwy, Victoria Stevenson:

“Fel Awdurdod Lleol, mae dyletswydd gofal arnom i ddiogelu ein preswylwyr. Mae’r canlyniad hwn yn amlygu’r gwaith caled gan Swyddogion Safonau Masnach Conwy wrth weithredu’r rheoliadau i ddiogelu defnyddwyr Conwy.

“Rydym ni’n benderfynol o fynd i’r afael â throseddau stepen y drws a sicrhau bod y masnachwyr diegwyddor yma’n meddwl ddwywaith cyn targedu preswylwyr diamddiffyn yn Sir Conwy.”

Awgrymiadau Defnyddiol:

Peidiwch â chytuno i waith trwsio yn y fan a’r lle:

Peidiwch â gwneud penderfyniadau byrbwyll. Siaradwch efo rhywun yr ydych yn ymddiried ynddynt cyn gwneud penderfyniad.

Peidiwch â cholli eich hawliau: Peidiwch â llofnodi unrhyw beth yn y fan a’r lle:

Mae gennych 14 diwrnod i ganslo unrhyw bryniannau dros £42 yr ydych yn eu gwneud yn eich cartref.  Os bydd rhywun yn gwrthod rhoi hysbysiad ysgrifenedig i chi yn dweud sut ac i bwy y dylech gyflwyno eich dymuniad i ganslo - byddant yn cyflawni trosedd.

Byddwch yn wyliadwrus o gynigion arbennig neu rhybuddion bod eich cartref yn anniogel:

Fel arfer ni fydd yn gynnig mor arbennig â hynny, a ddylech chi ddim cynhyrfu - pam nad oes unrhyw un arall wedi sylwi bod eich cartref yn beryglus?

Cytunwch ar y pris, y trefniadau talu a’r dyddiadau dechrau/darfod yn ysgrifenedig cyn i unrhyw waith ddechrau yn eich cartref:

Gwnewch yn siŵr eich bod yn gwbl fodlon â’r gwaith cyn gwneud y taliad llawn.

Os ydych yn meddwl eich bod wedi cael eich twyllo, yn pryderu am fasnachwr neu os oes gennych unrhyw amheuon, ffoniwch:

Heddlu Gogledd Cymru: 101 (Os ydych yn teimlo dan fygythiad gan unrhyw werthwr stepen drws, dylech gau'r drws a ffonio rhif argyfwng yr Heddlu 999).

Gwasanaethau Defnyddwyr Cyngor Ar Bopeth:  0808 223 1144 (Cymraeg) 0808 223 1133 (Saesneg)

Gall masnachwyr sydd eisiau rhagor o gyngor gysylltu â Safonau Masnach Conwy drwy ffonio 01492 574110 neu ewch i www.conwy.gov.uk/safonaumasnach neu ConwyTS@Facebook.com