Cartrefi gwag: cymorth ariannol i berchnogion tai gwag

Benthyciadau di-log o hyd at £35,000 yr uned (yn amodol ar y cyllid sydd ar gael ac ar fod yn gymwys) pan fydd eiddo/adeilad wedi bod yn wag am 6 mis neu fwy.

Mae modd defnyddio’r benthyciad tuag at drawsnewid adeiladau masnachol neu fannau gwag uwchben siopau’n llety preswyl (yn amodol ar ganiatâd cynllunio). Mae’n rhaid i bob eiddo gael ei werthu neu ei osod ar ôl cwblhau’r gwaith.

Bydd y benthyciad yn cael ei sicrhau trwy bridiant cyntaf neu ail bridiant gyda’r Gofrestrfa Tir ac mae uchafswm cyfradd benthyciad-i-werth o 80%. Rhaid i unrhyw fenthyciwr roi eu caniatâd i’r pridiant.

Mae’n rhaid ad-dalu’r benthyciad o fewn 2 flynedd os yw’r eiddo’n cael ei werthu, neu 5 mlynedd os yw’n cael ei osod (fel llety preswyl yn unig – nid yw’r benthyciad hwn ar gael ar gyfer eiddo i’w osod fel llety gwyliau / tymor byr). Codir llog o 6% mewn achosion o ddiffygdalu (gan ôl-ddyddio i’r dyddiad lle rhyddhawyd y cyllid ar gyfer y benthyciad yn wreiddiol). Mae isafswm ffi ymgeisio o £395 (yn ddibynnol ar y swm a fenthycir).

Cynllun Grant ‘Troi Mannau Gwag yn Lleoedd i Fyw’ Mae grantiau hyd at £25,000 (fesul uned) ar gael i eiddo gwag yng Nghanol Trefi Bae Colwyn, Llandudno neu Abergele/Pensarn. Gellir defnyddio'r Grant ar gyfer adnewyddu eiddo preswyl presennol, neu ar gyfer eiddo masnachol/mannau gwag y gellir eu troi'n llety preswyl (yn amodol ar y caniatâd cynllunio angenrheidiol).

Mae’n rhaid i eiddo fod wedi bod yn wag am 6 mis neu fwy ac mae’n rhaid i'r perchennog gyfrannu at o leiaf 30% o gost y gwaith ei hun. Ar ôl cwblhau’r gwaith, mae’n rhaid prydlesu'r llety i'r Awdurdod Lleol am o leiaf 5 mlynedd, ac yn ystod y cyfnod hwnnw bydd yn cael ei ddefnyddio i ddarparu llety i aelwydydd digartref. Bydd rhent yn cael ei dalu yn ystod y cyfnod hwn ar gyfradd y Lwfans Tai Lleol ar gyfer maint yr eiddo – gweler Cynllun Prydlesu Sector Preifat Conwy.

Bydd y Grant yn cael ei gyflwyno drwy bridiant cyntaf neu ail bridiant gan y Gofrestrfa Tir (yn amodol ar gymhareb 'benthyciad a gwerth' o 80% ar y mwyaf) a'i ddileu ar ôl bodloni'r amodau am 5 mlynedd. Bydd angen i unrhyw Fenthyciwr gydsynio i'r Pridiant a'r Cytundeb Prydles arfaethedig. Ni fydd dim i'w ad-dalu os cedwir at y telerau ac amodau yn ystod y cyfnod ond bydd yn rhaid ad-dalu’r Grant yn llawn os na fydd yr amodau’n cael eu bodloni. Pan fydd y pum mlynedd wedi dod i ben, ni chyfyngir ar y math o denantiaeth na lefel y rhent, ond gellir dal ati â’r gwasanaethau rheoli os gwneir cais am hynny.

Mae Grant hyd at £20,000 fesul eiddo (yn amodol ar argaeledd cyllid a chymhwysedd). Rhaid i'r eiddo fod wedi bod yn wag am 6 mis neu fwy. Y ffi ymgeisio yw £200. Mae’n rhaid i eiddo fod wedi bod yn wag am 6 mis neu fwy ac mae’n rhaid i'r perchennog gyfrannu at o leiaf 30% o gost y gwaith ei hun.

Ar ôl cwblhau’r gwaith, mae’n rhaid prydlesu'r llety i'r Awdurdod Lleol am o leiaf 5 mlynedd, ac yn ystod y cyfnod hwnnw bydd yn cael ei ddefnyddio i ddarparu llety i aelwydydd digartref. Bydd rhent yn cael ei dalu yn ystod y cyfnod hwn ar gyfradd y Lwfans Tai Lleol ar gyfer maint yr eiddo – gweler Cynllun Prydlesu Sector Preifat Conwy.

Bydd y Grant yn cael ei gyflwyno drwy bridiant cyntaf neu ail bridiant gan y Gofrestrfa Tir (yn amodol ar gymhareb 'benthyciad a gwerth' o 80% ar y mwyaf) a'i ddileu ar ôl bodloni'r amodau am 5 mlynedd. Bydd angen i unrhyw Fenthyciwr gydsynio i'r Pridiant a'r Cytundeb Prydles arfaethedig. Ni fydd dim i'w ad-dalu os cedwir at y telerau ac amodau yn ystod y cyfnod ond bydd yn rhaid ad-dalu’r Grant yn llawn os na fydd yr amodau’n cael eu bodloni. Pan fydd y pum mlynedd wedi dod i ben, ni chyfyngir ar y math o denantiaeth na lefel y rhent, ond gellir dal ati â’r gwasanaethau rheoli os gwneir cais am hynny.

Mae Llywodraeth Cymru wedi datblygu’r cynllun hwn ar gyfer eiddo sydd wedi bod yn wag ac heb ddodrefn am 12 mis neu fwy a rhaid dangos tystiolaeth drwy gofnodion Treth y Cyngor. Mae’r grant ar gael dim ond ar gyfer perchnogion sy’n bwriadu byw yn yr eiddo eu hunain unwaith y bydd gwaith ailwampio wedi’i gwblhau ac un o amodau’r grant yw bod yn rhaid iddyn nhw fyw yno am 5 mlynedd. Nid yw eiddo sydd heb eu rhestru fel eiddo domestig ar gyfer dibenion Treth y Cyngor yn gymwys.

Bydd y grantiau yn symiau o rhwng £1,000 a £25,000 a gellir eu defnyddio dim ond ar gyfer gwaith trwsio y mae’r awdurdod lleol wedi’i nodi fel gwaith angenrheidiol (ar adeg yr ymweliad cychwynnol) i wneud yr eiddo’n ddiogel, ac ar gyfer gwaith gwella effeithlonrwydd ynni (ond nid ar gyfer gwaith effeithlonrwydd ynni yn unig).

Mae’n rhaid i’r perchennog hefyd gyfrannu at gost y gwaith. Bydd grantiau’n cael eu diogelu drwy Bridiant Cyfreithiol gyda’r Gofrestrfa Tir a bydd unrhyw fenthyciwr gyda phridiant ar yr eiddo eisoes felly’n gorfod rhoi ei ganiatâd i gymryd Pridiant arall. Bydd angen ystyried swm yr ecwiti yn yr eiddo ar adeg cofrestru’r Pridiant.

I ddarganfod mwy am y cynllun, gweld atebion ar gyfer cwestiynau cyffredin ac i wneud cais i ymuno - gweler Grant Cartrefi Gwag Cenedlaethol Cymru.

Cynllun Grantiau Cartrefi Gwag Cenedlaethol

Am Gwestiynau Cyffredin yn ymwneud â’r Cynllun Grantiau Cartrefi Gwag Cenedlaethol, dilynwch Cynllun Grantiau Cartrefi Gwag Cenedlaethol.

Bob grant a benthyciad arall

Cymhwystra

A oes yn rhaid i'r eiddo fod yn annedd bresennol i fod yn gymwys?

Na. Gellir defnyddio pob opsiwn ariannu i gefnogi gwaith i drawsnewid eiddo masnachol, neu ofodau gweigion, yn llety preswyl hunangynhwysol, yn ogystal ag eiddo presennol. Mae’n rhaid i bob eiddo fod wedi cael ei nodi'n wag am 6 mis neu fwy yn ein cofnodion Treth y Cyngor neu Gyfraddau Busnes i fod yn gymwys.

A all cwmnïau cyfyngedig wneud cais am unrhyw gymorth ariannol sydd ar gael?

Gallant. Fodd bynnag, cynhelir gwiriadau diwydrwydd dyladwy ychwanegol ar y cwmni a phob cyfarwyddwr.

A yw fy eiddo'n addas i'w brydlesu?

Wrth asesu addasrwydd ar gyfer prydlesu, byddwn yn ystyried lleoliad, maint yr eiddo a'i fath a'i gynllun. Yr ardaloedd targed presennol fyddai Llandudno, Cyffordd Llandudno, Conwy, Deganwy, Mochdre, Bae Colwyn, Hen Golwyn ac Abergele, ond gellir ystyried ardaloedd eraill os oes ganddynt fynediad at wasanaethau cludiant cyhoeddus rheolaidd. Eiddo o ddiddordeb penodol ar hyd o bryd fyddai eiddo 1 ystafell wely, fflatiau llawr gwaelod / byngalos ac eiddo sydd wedi eu haddasu ar gyfer cadeiriau olwyn / symudedd.

Ystyrir unrhyw eiddo a gynigir fesul achos unigol ac yn ddibynnol ar ein hangen ar adeg cynnig yr eiddo.

Cyllido

A allaf wneud cais am fwy nag un grant / benthyciad ar yr un eiddo?

Ni ellir ychwanegu grantiau at ei gilydd. Fodd bynnag, mae'n bosibl gwneud cais am grant a benthyciad ar yr un eiddo (yn amodol ar gymhwystra), os oes digon o ecwiti i sicrhau'r ddau.

A ellir cael cymeradwyaeth mewn egwyddor cyn prynu eiddo?

Yn anffodus ni ellir rhoi cymeradwyaeth mewn egwyddor cyn i eiddo gael ei brynu.

Mae hyn oherwydd mai cyllid cyfyngedig sydd gennym ac amserlenni pendant y mae'n rhaid ymrwymo a gwario'r cyllid grant / benthyciad o fewn iddynt. Mae yna hefyd risg na fydd pryniant eiddo'n symud yn ei flaen - er enghraifft, os yw gwerthiant yn aflwyddiannus - gallai hyn arwain at ymrwymo amser staff ac adnoddau i geisiadau na ellir eu datblygu yn y pen draw.

I sicrhau bod y cyllid sydd ar gael yn cael ei ddefnyddio mor effeithiol â phosibl, 'rydym yn blaenoriaethu ceisiadau lle mae'r ymgeisydd eisoes yn berchen ar yr eiddo ac mewn sefyllfa i ddatblygu'r gwaith arfaethedig o fewn yr amserlenni gofynnol.

A ganiateir ailariannu yn dilyn cwblhau'r gwaith adnewyddu?

Bydd Cyngor Conwy'n sicrhau Pridiant Cyfreithiol gyda'r Gofrestrfa Tir cyn rhyddhau unrhyw gyllid. Mae'n rhaid i hyn fod drwy Bridiant cyntaf neu ail Bridiant. Os oes morgais / benthyciad presennol ar yr eiddo, bydd angen caniatâd y benthycwyr arnom i sicrhau ein Pridiant y tu ôl i hyn (fel ail Bridiant).

Os yw perchnogion eisiau ailariannu tra mae ein Pridiant yn dal mewn grym, gall Cyngor Conwy gytuno i ollwng o Bridiant cyntaf i ail Bridiant, os oes digon o ecwiti yn yr eiddo i gynnal y ddau Bridiant, heb i'r gymhareb benthyciad a gwerth fynd yn uwch nag 80%. Bydd arnom angen gweld prisiad cyfredol o'r eiddo yn ei ffurf bresennol, ynghyd â chynnig morgais cyn rhoi caniatâd.

Os oes gan Gonwy ail Bridiant eisoes, ni fydd yn bosibl gollwng i drydydd Pridiant i ategu cyllid arall sy'n cael ei sicrhau.

Nid oes gennyf ddigon o ecwiti yn yr eiddo i'ch Pridiant Cyfreithiol fod wedi ei sicrhau. Beth allaf ei wneud?

Gall fod yn bosibl sicrhau Pridiant Cyfreithiol ar eiddo gwahanol os oes digon o ecwiti yn yr eiddo hwnnw i'w gwmpasu, yn ogystal ag unrhyw fenthyciad wedi ei sicrhau, heb i'r gymhareb benthyciad a gwerth fynd yn uwch nag 80%. Mae'n rhaid i bob perchennog cyfreithiol yr eiddo roi ei gytundeb.

Gwaith

A allaf ddewis fy nghontractwyr fy hun?

Nid yw Cyngor Conwy'n rhan o'r gwaith o ddewis contractwyr, felly eich cyfrifoldeb chi yw dewis eich contractwyr eich hun. Dylech sicrhau bod eich contractwr dewisol yn darparu gwerth am arian a bod ganddo'r cymwysterau / profiadau addas ar gyfer y dasg dan sylw. Efallai y bydd angen nifer o gontractwyr arnoch i wneud gwahanol waith.

A allaf wneud y gwaith fy hun (DIY)?

Gellwch wneud rhai elfennau o'r gwaith eich hun, ond dim ond cost y deunyddiau y gellir ei chynnwys at ddibenion y grant / benthyciad.

'Rwyf hefyd yn ddatblygwr / adeiladwr; a allaf gael mynediad at gyllid os wyf yn gwneud y gwaith fy hun?

Os yw'r gwaith yn cael ei wneud gan gwmni adeiladu sy'n gwmni cyfyngedig, yna gall fod yn bosibl hawlio cyllid. Byddwn yn gofyn am dri dyfynbris ar gyfer y gwaith, yn hytrach na'r ddau arferol. Bydd yn rhaid i ni asesu union amgylchiadau'r strwythur perchnogaeth a strwythur perchnogaeth y cwmni adeiladu cyn cadarnhau.

Faint o amser sydd gennyf i gwblhau'r gwaith?

Cytunir ar yr amserlen gyda Swyddog Cartrefi Gwag, yn dibynnu ar lefel y gwaith sy'n ofynnol. Efallai y pennir rhai amserlenni i sicrhau bod cyllid yn cael ei wario o fewn cyfnod argaeledd.

Y broses

Beth yw eich proses ymgeisio am grant / fenthyciad?

• Gwiriadau cymhwystra, ymweliad addasrwydd a chytundeb gyda'r Swyddog Cartrefi Gwag ynglŷn â pha opsiwn ariannu fydd fwyaf addas.
• Llenwi a chyflwyno ffurflen gais a dogfennau ategol.
• Tîm Cartrefi Gwag i gynnal gwiriadau diwydrwydd dyladwy ar bob perchennog eiddo / cyfarwyddwr cwmni, yn cynnwys gwirio credyd.
• Pan fo'n fodlon, cyflwyno i'r panel grant / benthyciad mewnol am benderfyniad.
• Yn dilyn cyflwyno i'r panel, efallai y byddwn yn gofyn am fwy o wybodaeth cyn gwneud penderfyniad.
• Os cymeradwyir y cais, llunnir gwaith papur cyfreithiol a'u cyflwyno i gael eu llofnodi.
• Dychwelyd gwaith papur wedi ei lofnodi, cyflwyno ffi(oedd) perthnasol, yna cymeradwyaeth gan CBSC.
• Cyflwyno Pridiant Cyfreithiol i Gofrestrfa Tir EF i'w gofrestru (ar ôl cofrestriad Tâ'r Cwmnïau os y'’n Gwmni Cyfyngedig).
• Pan fo cadarnhad o gofrestru'r Pridiant Cyfreithiol wedi ei dderbyn a chyfraniad yr ymgeisydd ei hun (os yw'n berthnasol) wedi ei wario, rhyddheir arian i'r ymgeisydd. Sylwer, ar gyfer symiau mwy, neu fwy nag un opsiwn ariannu, efallai y rhoddir taliadau fesul cam.
• Gwaith yn cael ei gwblhau a'i oruchwylio gan yr ymgeisydd gan sicrhau bod safonau terfynol yn cael eu bodloni. Swyddogion Cartrefi Gwag i archwilio'n rheolaidd i sicrhau bod amserlenni'n cael eu bodloni a bod y gwaith yn cael ei wneud yn briodol.
• Ymweliad terfynol i gymeradwyo'r gwaith a chasglu ardystiad diogelwch.

Faint fydd yn ei gymryd i gael yr arian?

Os darperir yr holl ddogfennau gofynnol ar y cychwyn, dylai fod yn bosibl cael penderfyniad ar eich cais ymhen rhyw 3-4 wythnos. Bydd yna gyfnod pellach ar ôl hyn er mwyn llunio gwaith papur cyfreithiol, ei lofnodi ac er mwyn cofrestru'r Pridiant Cyfreithiol gyda Chofrestrfa Tir EF. Os yw'r ymgeisydd yn gwmni cyfyngedig, bydd yn rhaid cofrestru'r Pridiant Cyfreithiol yn gyntaf gyda Thâr Cwmnïau, a fydd yn ymestyn yr amserlen. Ar ôl cofrestru'r Pridiant, gall gymryd 1-2 wythnos i chi dderbyn arian.

Sylwer, bras amcan yw'r amserlenni, a gall yr adnoddau sydd ar gael effeithio arnynt. Os ydym yn meddwl y bydd yna oedi, byddwn yn rhoi gwybod i chi cyn gynted â phosibl.

Pwy yw'r panel grant / benthyciad?

Mae'r panel yn cynnwys 3 aelod o staff, yn cynnwys Cyfreithiwr, Rheolwr y Gwasanaethau Tai a Phennaeth Tai, Cynllunio a Lle. Mae'n rhaid i bob un o aelodau'r panel roi cymeradwyaeth ar gyfer ariannu.

Pa ddogfennau / wybodaeth fydd eu hangen arnoch gennyf i wneud cais?

• Ffurflen gais wedi ei llenwi. I'w darparu pan fo gwiriadau cymhwystra / addasrwydd wedi eu cwblhau.
• Prawf o berchnogaeth yr eiddo drwy ddogfen gwybodaeth deitl y Gofrestrfa Tir, yn cynnwys cynllun (mae'n rhaid iddo fod yn 'gopi swyddogol') a ddyddiwyd o fewn y mis diwethaf. Gellir cael hyn ar-lein am ffi fach.
• Dau fath o brawf adnabod ar gyfer pob perchennog cyfreithiol a restrir ar y ddogfen gwybodaeth deitl - dylai un fod yn brawf adnabod ffotograffig (pasbort / trwydded yrru) a'r llall yn brawf cyfeiriad (cyfriflen banc / bil cyfleustodau). Bydd yn rhaid i Swyddog y Cyngor weld y dogfennau gwreiddiol yn bersonol i'r gwirio a gwneud copïau. Os nad ydych yn lleol, siaradwch â ni ynglŷn â sut i wirio'r rhain.
• Dau ddyfynbris ar gyfer y gwaith a nodwyd.
• Prawf o gyllid ar gyfer diffyg / cyfraniad yr ymgeisydd.

Ar gyfer cwmnïau cyfyngedig, bydd angen y canlynol arnom hefyd:

• Copi o gofnodion cyfarfod y cwmni yn datgan y bwriad i wneud cais am gyllid.
• Cyfrifon y cwmni am dair blynedd.
• Gwarantau personol gan bob cyfarwyddwr.

Pan fo'r gwaith wedi ei gwblhau, os yw'r eiddo'n mynd i fod yn ymuno â'n Cynllun Prydlesu, bydd mwy o ddogfennau / tystysgrifau diogelwch yn ymwneud â'r eiddo yn ofynnol hefyd.

Os ydych chi’n adnewyddu eiddo heb ei feddiannu, efallai y byddai’n bosib elwa o gyfradd TAW gostyngedig ar waith adnewyddu.

Er mwyn cael eich ystyried, mae'n rhaid i'r eiddo fod wedi bod yn wag ers 2 flynedd o leiaf, ac yn uniongyrchol cyn dechrau'r gwaith adnewyddu.

Mae canllawiau CThEM yn nodi bod llythyr gan yr Awdurdod Lleol yn cadarnhau bod yr eiddo wedi bod yn wag am y cyfnod cymhwyso yn gwbl dderbyniol. Dylech siarad â’ch contractwr am hyn gan y bydd angen iddynt godi’r TAW cywir arnoch.