Adolygiad Achos Ymddygiad Gwrthgymdeithasol
Mae Adolygiad Achos Ymddygiad Gwrthgymdeithasol (a elwid gynt yn “Sbardun Cymunedol”) yn rhan o Ddeddf Ymddygiad Gwrthgymdeithasol, Troseddu a Phlismona 2014, a chafodd ei gyflwyno ledled gogledd Cymru ar 20 Hydref 2014.
Pwrpas Adolygiad Achos Ymddygiad Gwrthgymdeithasol yw galluogi dioddefwyr ymddygiad gwrthgymdeithasol i wneud cais am adolygiad o’u hachos a dod â chyrff perthnasol ynghyd i ganfod datrysiad.
Gellwch ofyn i’ch achos gael ei adolygu gan banel (Grŵp Gorchwyl Ymddygiad Gwrthgymdeithasol) os yw’n bodloni meini prawf penodol. Bydd y panel adolygu yn cael ei dynnu o sefydliadau perthnasol a fydd yn edrych ar y cyd ar y materion yr ydych wedi eu hadrodd. Bydd hefyd yn edrych ar unrhyw gamau gweithredu a gymerwyd i benderfynu a oedd y camau gweithredu’n ddigonol yn seiliedig ar ddisgwyliadau ac amserlenni rhesymol. Gall y panel adolygu wneud argymhellion ar gyfer camau gweithredu pellach i’w cymryd er mwyn ceisio datrys y broblem. Os yw mwyafrif y partneriaid wedi bod yn rhan o’r achos, gellir penodi Cadeirydd annibynnol.
Pwrpas Adolygiad Achos Ymddygiad Gwrthgymdeithasol yw adolygu achosion a chamau gweithredu penodol a gymerwyd o ganlyniad i’r digwyddiadau o ymddygiad gwrthgymdeithasol y rhoddir gwybod amdanynt. Mae’r pwyslais ar sicrhau bod lefelau priodol o orfodaeth a chefnogaeth ar waith neu wedi cael eu hystyried.
Nid proses gwyno yw Adolygiad Achos Ymddygiad Gwrthgymdeithasol. Os ydych yn dymuno gwneud cwyn am ymddygiad unigolyn, mae’n rhaid i chi ddefnyddio gweithdrefn gwyno sefydliad penodol yr unigolyn hwnnw.
Y Trothwy a Chwynion Cymwys
Er mwyn ysgogi Adolygiad Achos Ymddygiad Gwrthgymdeithasol mae’n rhaid i gŵyn gymwys fod wedi cael ei gwneud i un o’r cyrff perthnasol. Byddai cwyn gymwys:
- yn dri adroddiad gan unigolyn;
- yn ymwneud â thri digwyddiad ar wahân o ymddygiad gwrthgymdeithasol; ac
- wedi ei hadrodd wrth unrhyw asiantaeth leol o fewn cyfnod o chwe mis.
Mae’n rhaid i’r meini prawf canlynol fod yn berthnasol hefyd:
- i gyrraedd y trothwy mae’n rhaid i bob digwyddiad fod wedi ei adrodd wrth o leiaf un o’r cyrff perthnasol o fewn mis i’r digwyddiad;
- mae’n rhaid i’r digwyddiad cyntaf y rhoddwyd gwybod amdano fod o fewn chwe mis i’r cais am adolygiad achos o dan weithdrefn Adolygu Achosion Ymddygiad Gwrthgymdeithasol;
- gall cwyn gymwys fod yn achos caeedig neu agored o ymddygiad gwrthgymdeithasol i unrhyw gorff perthnasol yng Nghonwy.
Fodd bynnag, os na ellwch fodloni’r meini prawf uchod ond eich bod yn teimlo:
- eich bod mewn perygl o niwed o ganlyniad i’r ymddygiad gwrthgymdeithasol; neu
- ystyrir bod ymateb yr asiantaeth neu’r asiantaethau yn annigonol; neu
- ystyrir bod natur yr ymddygiad gwrthgymdeithasol yn ddi-baid a pharhaus;
Gellwch wneud cais am adolygiad achos, ac asesir addasrwydd y cais hwnnw yn ôl y meini prawf.
Gellir hefyd ysgogi Adolygiad Achos Ymddygiad Gwrthgymdeithasol trwy drydydd parti, fel Aelod Seneddol, Aelod o’r Senedd, cynghorydd lleol, grŵp cymunedol, neu ofalwr i unigolyn diamddiffyn neu rywun ag anableddau a fyddai’n ei atal rhag gwneud cais am adolygiad achos ei hun.
Gall trydydd parti wneud cais am adolygiad achos ar ran dioddefwr dim ond os yw wedi cael caniatâd wedi ei lofnodi gan y dioddefwr i wneud hynny. Bydd gwiriadau’n cael eu gwneud i sicrhau bod ceisiadau trydydd parti yn rhai dilys; cysylltir â’r dioddefwr i sicrhau ei fod yn fodlon bod y cais yn cael ei wneud.
Sut y gellwch wneud cais am Adolygiad Achos Ymddygiad Gwrthgymdeithasol?
- Llenwi ffurflen ar-lein
- Anfon e-bost at ConwyDiogelach@conwy.gov.uk yn datgan eich bod yn dymuno gwneud cais am Adolygiad Achos Ymddygiad Gwrthgymdeithasol. Bydd Swyddog Ymddygiad Gwrthgymdeithasol yn cysylltu â chi’n uniongyrchol wedyn; neu
- Ffoniwch 01492 575177 a rhoi gwybod i’r sawl sy’n ateb y ffôn eich bod yn dymuno gwneud cais am Adolygiad Achos Ymddygiad Gwrthgymdeithasol. Bydd Swyddog Ymddygiad Gwrthgymdeithasol yn cael gwybod ac yn cysylltu â chi’n uniongyrchol wedyn; neu
- Ysgrifennwch at Swyddog Ymddygiad Gwrthgymdeithasol, Cyngor Bwrdeistref Sirol Conwy, Diogelwch Cymunedol, Blwch Post 1, Bae Colwyn, LL29 0GG.
Ffurflen