Buddsoddiad o £500,000 yng Ngwasanaethau Diwylliannol Conwy

Buddsoddiad o £500,000 yng Ngwasanaethau Diwylliannol Conwy

Llyfrgell Bae Colwyn

Mae Cyngor Bwrdeistref Sirol Conwy wedi croesawu buddsoddiad gan Lywodraeth Cymru mewn dau brosiect allweddol, a fydd yn cefnogi dyfodol gwasanaethau diwylliant, llyfrgelloedd ac archifau yng Nghonwy.

Dyfarnwyd cyllid i ddatblygu anecs newydd yn Llyfrgell Bae Colwyn drwy Raglen Grantiau Cyfalaf Trawsnewid Llywodraeth Cymru, a bydd cynllun grant Buddsoddiad Sector Lleol Llywodraeth Cymru yn ariannu prosiect Dyfodol Diwylliant Creadigol Conwy. 

Y cynllun yn Llyfrgell Bae Colwyn yw creu man cyfoes sy’n effeithlon o ran ynni, i storio’r casgliadau llyfrgell a ddefnyddir gan wasanaethau allgymorth, llyfrgelloedd cymunedol, gwasanaeth llyfrgell cartref a theithiol, a mentrau lles.  Bydd gwella’r cyfleuster hwn o gymorth i sicrhau y gall y gwasanaethau barhau i ddiwallu anghenion cymunedau ledled Conwy am flynyddoedd i ddod.

Bydd prosiect Dyfodol Diwylliant Creadigol Conwy yn darparu platfform digidol dwyieithog a chwbl hygyrch ar gyfer y gwasanaethau Diwylliant, Llyfrgelloedd ac Archifau. Bydd y gwasanaeth ar-lein modern ac integredig hwn yn ei gwneud yn haws i breswylwyr ac ymwelwyr ddarganfod ac ymgysylltu â diwylliant, treftadaeth, archifau, cyfleoedd dysgu, digwyddiadau a gweithgareddau creadigol ledled y sir.

Gyda’i gilydd, bydd y prosiectau hyn yn atgyfnerthu’r isadeiledd ffisegol a digidol sy’n ategu gwasanaethau diwylliannol ledled Conwy.

Dywedodd Gweinidog y Cabinet dros Ddiwylliant a Chwaraeon, Heledd Fychan: "Bydd y buddsoddiad hwn yn gwneud gwahaniaeth gwirioneddol i'r ffordd y mae pobl yng Nghonwy yn ymwneud â diwylliant, treftadaeth a dysgu. Bydd yr anecs newydd yn Llyfrgell Bae Colwyn yn diogelu casgliadau hanfodol ac yn cefnogi'r gwasanaethau allgymorth, lles a chymunedol y mae cymaint o bobl yn dibynnu arnynt, tra bydd Gwaith Creadigol yn y Dyfodol Creu Conwy yn ei gwneud hi'n haws nag erioed i bobl ddarganfod a mwynhau diwylliant a threftadaeth y sir ar-lein, yn Gymraeg a Saesneg.

"Mae'r prosiectau hyn yn dangos beth y gellir ei gyflawni pan fydd seilwaith ffisegol ac arloesi digidol yn gweithio law yn llaw. Mae cefnogi amgueddfeydd, llyfrgelloedd ac archifau i foderneiddio a dod yn fwy hygyrch a chynaliadwy yn flaenoriaeth allweddol i ni, ac edrychaf ymlaen at weld y gwahaniaeth cadarnhaol y mae'r buddsoddiad hwn yn ei wneud i gymunedau ledled Conwy."

Dywedodd y Cynghorydd Dilwyn Roberts, Aelod Cabinet Diwylliant, Hamdden a Gwasanaethau Llywodraethu: “Rydym yn falch iawn bod Llywodraeth Cymru wedi dewis buddsoddi yn nyfodol diwylliant, llyfrgelloedd ac archifau yng Nghonwy.  Bydd y prosiectau hyn yn ein cynorthwyo i amddiffyn a gwella asedau cymunedol pwysig, ehangu mynediad at ddiwylliant a dysgu, atgyfnerthu gwasanaethau digidol a sicrhau bod ein hisadeiledd diwylliannol yn parhau’n gynaliadwy ar gyfer cenedlaethau’r dyfodol.

“Boed drwy wella cyfleusterau cymunedol neu wella mynediad digidol, bydd y buddsoddiad yn helpu mwy o bobl i gysylltu â diwylliant, treftadaeth a chreadigrwydd cyfoethog Conwy.”

Mae cyfanswm o £501,935.50 o gyllid Llywodraeth Cymru wedi’i ddyfarnu i’r prosiectau ac maent yn canolbwyntio ar foderneiddio cyfleusterau, gwella hygyrchedd, croesawu arloesedd digidol a helpu amgueddfeydd, llyfrgelloedd ac archifau i barhau i wasanaethu eu cymunedau ledled Cymru.