Cyngor Bwrdeistref Sirol Conwy yn Gohirio Penderfyniad ar Ardoll Ymwelwyr

Cyngor Bwrdeistref Sirol Conwy yn Gohirio Penderfyniad ar Ardoll Ymwelwyr

Ardoll Ymwelwyr

Cyfarfu Cyngor Llawn Cyngor Bwrdeistref Sirol Conwy ar 24 Medi 2026 i ystyried y posibilrwydd o gyflwyno Ardoll Ymwelwyr yn y sir.

Cefnogodd yr Aelodau argymhelliad i ohirio unrhyw benderfyniad ar gyflwyno Ardoll Ymwelwyr nes bod rhagor o dystiolaeth a phrofiad ymarferol ar gael, er mwyn gallu cynnal asesiad gwybodus a chynhwysfawr o’i heffeithiau a’i manteision posibl.

Rhwng 20 Mai a 17 Gorffennaf 2026, cynhaliodd y Cyngor ymgynghoriad cyhoeddus i gasglu barn trigolion, ymwelwyr a busnesau ar y posibilrwydd o gyflwyno Ardoll Ymwelwyr yn Sir Conwy. Amlygodd yr ymatebion bryder sylweddol ynghylch y diffyg data a thystiolaeth gadarn sydd ar gael ar hyn o bryd i asesu goblygiadau posibl cyflwyno’r ardoll yn llawn.

Roedd pryderon eraill yn canolbwyntio ar effaith economaidd bosibl cyflwyno Ardoll Ymwelwyr a gallu Conwy i barhau’n gystadleuol fel cyrchfan, gan fod canfyddiad y gallai’r ardoll arwain at lai o archebion, arosiadau byrrach a gostyngiad yng ngwariant ymwelwyr. Roedd amseriad posibl cyflwyno Ardoll Ymwelwyr hefyd yn destun pryder, gan fod yr amodau economaidd a busnes presennol eisoes yn rhoi pwysau sylweddol ar fusnesau lleol a’r sector twristiaeth ehangach.

Yng ngoleuni’r adborth hwn, argymhellodd yr adroddiad y dylid gohirio penderfyniad nes bod modd casglu tystiolaeth fwy cynhwysfawr. Bydd y dull hwn hefyd yn galluogi’r Cyngor i fonitro ac asesu’r modd y caiff Ardollau Ymwelwyr eu cyflwyno mewn rhannau eraill o Gymru, gan ddarparu gwybodaeth werthfawr am sut mae cynlluniau o’r fath yn gweithio’n ymarferol a pha mor effeithiol ydynt o ran cyflawni’r canlyniadau a fwriadwyd.

Cafodd yr argymhelliad ei gymeradwyo’n flaenorol gan y Pwyllgor Trosolwg a Chraffu Economi a Lle ar 9 Medi 2026, cyn cael ei gymeradwyo gan y Cyngor Llawn ar 24 Medi 2026.

Dywedodd y Cynghorydd Sharon Doleman, Aelod Cabinet Economi Gynaliadwy a Chyfathrebu:

“Mae twristiaeth yn chwarae rhan hollbwysig yn economi Conwy, ac mae’n rhaid i unrhyw benderfyniad ynghylch cyflwyno Ardoll Ymwelwyr fod yn seiliedig ar dystiolaeth gadarn a dealltwriaeth glir o’r effeithiau posibl ar drigolion, ymwelwyr a busnesau.

“Rydym wedi gwrando’n ofalus ar y safbwyntiau a rannwyd drwy’r ymgynghoriad, ac un o’r negeseuon cryfaf oedd yr angen am ragor o dystiolaeth cyn gwneud penderfyniad. Mae’r argymhelliad i ohirio penderfyniad yn adlewyrchu’r adborth hwnnw ac yn dangos ein hymrwymiad i sicrhau bod lleisiau lleol yn cael eu clywed fel rhan o’r broses o wneud penderfyniadau.

“Drwy gymryd yr amser i gasglu rhagor o dystiolaeth a dysgu o brofiadau awdurdodau lleol eraill ledled Cymru, gallwn sicrhau bod unrhyw benderfyniad yn y dyfodol yn un gwybodus a chytbwys, ac er budd gorau Sir Conwy.”