Llandudno yn dechrau'r Daith at Statws Baner Borffor

Llandudno yn dechrau'r Daith at Statws Baner Borffor

Llandudno gyda'r nos

Mae gwaith yn mynd rhagddo i sicrhau statws Baner Borffor ar gyfer Llandudno, diolch i gyllid o Gronfa Ffyniant Gyffredin Llywodraeth y DU, i wella’r economi ymwelwyr a’i diogelu at y dyfodol.

Mae Cyngor Bwrdeistref Sirol Conwy wedi diogelu’r cyllid ac wedi llunio gweithgor amlasiantaeth newydd er mwyn datblygu’r hyn sydd gan y dref i’w gynnig gyda’r nos.

Mae cynrychiolwyr o faes twristiaeth, manwerthu, lletygarwch, hamdden, grwpiau cymunedol, Heddlu Gogledd Cymru a Mostyn Estates i gyd yn cyfranogi gan sicrhau bod amrywiaeth lawn profiad gyda’r nos yn y dref yn cael ei hystyried.

Mae Baneri Porffor, a ddyfernir gan y Gymdeithas Rheoli Trefi a Dinasoedd, yn cydnabod trefi a dinasoedd sy’n darparu amgylchedd gyda’r nos sy’n ddiogel, croesawgar ac amrywiol, rhwng 5pm a 5am.

Mae Gweithgor Baner Borffor Llandudno eisoes wedi nodi cryfderau presennol gan gynnwys cwmpas TCC, plismona gweithredol, ymgyrchoedd diogelwch sefydledig a sector lletygarwch amrywiol, a chyfleoedd i wella hygyrchedd, cludiant a gweithgarwch diwylliannol yn gynnar gyda’r nos.

Dywedodd y Cynghorydd Sharon Doleman, Aelod Cabinet Economi Gynaliadwy a Chyfathrebu:“Dyma gam cyffrous i Landudno. Byddai statws Baner Borffor yn dangos bod y dref yn lle bywiog, diogel a chynhwysol i fwynhau gyda’r nos. Rydym yn falch o weld cynifer o bartneriaid yn cydweithio i greu economi gyda’r nos sydd o fudd i breswylwyr, busnesau ac ymwelwyr.”

“Mae cais Llandudno yn dangos ymrwymiad hirdymor i gryfhau’r apêl gyda’r nos yn y dref a chefnogi ei thwf parhaus fel cyrchfan arfordirol arweiniol.”

Pe bai’n llwyddiannus, Llandudno fyddai’r dref Baner Borffor gyntaf yng ngogledd Cymru, a’r ardal arfaethedig fyddai’r cyntaf yn y DU i gynnwys pier.

Y cam nesaf yw cyflwyno’r cais yn y gwanwyn, a chynhelir asesiad yn yr haf.

Cronfa Ffyniant Gyffredin y DU: Nod Cronfa Ffyniant Gyffredin y DU yw gwella balchder mewn lleoedd a chynyddu cyfleoedd bywyd ledled y DU, drwy fuddsoddi mewn cymunedau a lleoedd, cefnogi busnesau lleol, a phobl a sgiliau.   I gael rhagor o wybodaeth, ewch i https://www.gov.uk/government/publications/uk-shared-prosperity-fund-prospectus.cy