Canolfannau Addysg Awyr Agored yn dathlu 60 mlynedd
Beicio mynydd
Cynhaliwyd digwyddiad i ddathlu 60 mlynedd o addysg awyr agored ddydd Sadwrn (10/10/26), gan nodi carreg filltir i Wasanaeth Addysg Awyr Agored Gogledd Cymru a'i ddwy ganolfan breswyl yn Nant Bwlch yr Haearn (Nant BH) a Phentrellyncymer.
Mynychwyd y digwyddiad, a gynhaliwyd yng Nghanolfan Addysg Awyr Agored Nant BH ger Llanrwst ddydd Sadwrn, gan aelodau o staff blaenorol a phresennol, yn ogystal â chyn-gyfranogwyr sydd wedi elwa ar yr amrywiaeth o weithgareddau a gynigir gan y ddwy ganolfan dros y blynyddoedd.
Rheolir y Canolfannau gan Gyngor Bwrdeistref Sirol Conwy. Maent yn darparu addysg awyr agored a phrofiadau preswyl o ansawdd uchel drwy ystod o weithgareddau sydd ar gael yn yr awyr agored i bobl ifanc o bob rhan o Ogledd Cymru.
Cafodd hen adeilad yr ysgol yn Nant BH, a oedd yn arfer gwasanaethu'r gymuned fwyngloddio leol, ei addasu at ddibenion newydd, ac mae estyniadau wedi'u gwneud iddo dros y degawdau. Bellach, mae cyfleusterau'r ganolfan yn cael eu canmol gan y rhai sy'n mynychu ystod eang o gyrsiau preswyl ar gyfer grwpiau ysgolion, cyrsiau dydd rheolaidd i grwpiau ag anghenion penodol a gwaith atgyfeirio gyda theuluoedd.
Mae Canolfan Pentrellyncymer ger Cerrigydrudion wedi parhau i ddatblygu cyrsiau preswyl i ysgolion gydag ystod o weithgareddau cyffrous gan gynnwys canŵio ar Lyn Brenig a beicio mynydd.
Dywedodd y Cynghorydd Aaron Wynne, Aelod Cabinet Conwy dros Addysg, “Rydym yn falch bod y ddwy ganolfan hyn yn cynnig cyfoeth o brofiadau i blant o bob un o’r chwe Awdurdod Lleol yng Ngogledd Cymru. O fwynhau ymweliadau â Nant BH a Phentrellyncymer fy hun yn blentyn, rwy’n deall yn iawn yr effaith gadarnhaol y gall y profiadau hyn eu cael ar bobl ifanc. Roedd cymaint o bobl a oedd yn bresennol ddydd Sadwrn wedi mynychu cyrsiau preswyl yn y Canolfannau dros y blynyddoedd ac wedi elwa o’r amser yr oeddent wedi’i dreulio yno.”
Mae'r ddwy ganolfan yn gweithredu yn unol â'r safonau uchaf o ran ansawdd a diogelwch, ac maent yn cael eu cydnabod gan achrediad Safon Aur yr AHOEC, y Bathodyn Ansawdd 'Dysgu y Tu Allan i'r Ystafell Ddosbarth' a thrwydded gyfredol yr AALA.
Ochr yn ochr â'r cynnig preswyl i ysgolion, mae'r Gwasanaeth Addysg Awyr Agored yn parhau i ehangu ei waith gyda'r gwasanaethau cymdeithasol ac yn edrych ymlaen at bartneriaeth newydd gyffrous gyda Phrifysgol Bangor sy'n darparu rhaglenni awyr agored i deuluoedd fel ymyrraeth iechyd.
Cysylltwch â chanolfannau Nant BH neu Pentrellyncymer drwy e-bost: nwoes@conwy.gov.uk neu ffoniwch Ganolfan Nant BH ar 01492 640735.
Nant BH a Pentre — Tudalen Hafan
Wedi ei bostio ar 16/10/2026