Beth yw parcio trigolion?
Mae cynlluniau parcio trigolion wedi’u cynllunio i wella nifer y llefydd parcio sydd ar gael ar y stryd i drigolion lleol, yn arbennig lle maent yn cael trafferthion parcio ger eu cartrefi. Bwriad y cynlluniau yw atal pobl sydd ddim yn drigolion megis cymudwyr a siopwyr rhag parcio ar strydoedd preswyl.
Mae’n rhaid i drigolion brynu ac arddangos trwydded sydd yn eu caniatáu i barcio heb gyfyngiad mewn llefydd parcio ar y stryd o fewn parth parcio dynodedig.
Sut mae’r cynllun parcio i drigolion yn gweithio?
Mae baeau parcio aros cyfyngedig wedi’u nodi ar y stryd. Mae’r cyfyngiad amser, amser o’r dydd a dyddiau’r wythnos yn amrywio yn ddibynnol ar anghenion ac amgylchiadau lleol.
Er enghraifft, byddai cyfyngiad amser cyffredin yn weithredol o ddydd Llun i ddydd Sadwrn, 8am tan 6pm, gan ganiatáu i bobl barcio am awr a heb ddychwelyd o fewn awr. Mae baeau parcio aros cyfyngedig yn caniatáu i rai nad ydynt yn ddeiliaid trwydded barcio ar y stryd am gyfnod penodol yn unig. Gall deiliaid trwydded (trigolion) barcio heb gyfyngiad amser.
Yn ddibynnol ar y cynlluniau ffodd unigol, byddwn hefyd yn ystyried cyflwyno llinellau melyn dwbl mewn ardaloedd lle bydd pobl o bosibl yn ceisio parcio er mwyn osgoi’r cyfyngiad parcio.
Bydd arwyddion a marciau ffordd yn cael eu defnyddio i ddangos ardaloedd lle gall trigolion barcio.
Trwyddedau
Os yw eich stryd wedi’i gynnwys yn y cynllun parcio i drigolion ac nad oes gennych le parcio oddi ar y stryd, bydd arnoch angen prynu trwydded i’ch caniatáu i barcio yn yr ardaloedd parcio arbennig heb gyfyngiadau amser.
Gellir cael un drwydded fesul aelwyd. Mae’n bosibl y bydd ail drwydded ar gael yn ddibynnol ar y llefydd parcio a faint o drwyddedau sydd wedi cael eu cyflwyno.
Gall trigolion brynu trwyddedau ymweld-dydd ar gyfer ymwelwyr cynllunedig sydd angen parcio am amser hirach na’r hyn a ganiateir dan y cyfyngiadau.
Mae’r drwydded yn cael ei rhoi i aelwyd y trigolion ei defnyddio a ni ellir ei throsglwyddo. Mae’n rhaid i’r sawl sy’n ymgeisio am drwydded barcio i drigolion fyw mewn cyfeiriad o fewn ffin y cynllun. I gadarnhau bod ymgeisydd yn byw yn y cyfeiriad hwnnw byddwn yn gwirio’r manylion a ddarparwyd yn erbyn y gofrestr etholwyr lawn. Mae’n bosibl y byddwn yn gofyn am ragor o dystiolaeth os nad yw’r enw/cyfeiriad yn cyd-fynd â’r wybodaeth sydd gennym ni.
Pan gaiff cynllun parcio trigolion ei roi ar waith, byddwn yn darparu rhagor o fanylion i’r trigolion yn yr ardal ar sut i brynu’r trwyddedau.
Prisiau'r drwydded
Mae trwyddedau’n costio £94.50 am flwyddyn ar gyfer y drwydded gyntaf, £132 am yr ail drwydded, yn amodol ar y galw. Mae’r prisiau hyn ar gyfer 2025/26 – rydym yn adolygu prisiau trwyddedau bob blwyddyn.
Bydd yr arian a wneir drwy werthu’r trwyddedau yn cyfrannu at weithredu a rheoli’r cynllun.
Beth yw’r broses ar gyfer cyflwyno cynllun parcio i drigolion?
Gallwn ond ystyried cyflwyno cynllun parcio i drigolion os oes gennym dystiolaeth bod y mwyafrif o drigolion yn gefnogol.
- Os hoffech chi gyflwyno cais ar gyfer cynllun yn eich ardal, dylech ddarparu tystiolaeth o gefnogaeth y trigolion lleol. Gallwch gysylltu â ni ar traffig@conwy.gov.uk neu ysgrifennu at yr Adran Draffig, Cyngor Bwrdeistref Sirol Conwy, Blwch Post 1, Conwy, LL30 9GN.
- Byddwn yn ymgynghori â’r aelwydydd a effeithir drwy holiadur. Rydym angen o leiaf 40% o aelwydydd i ymateb i’n cynigion a rhaid i 75% o’r rheiny fod o blaid cyflwyno cynllun parcio trigolion. Bydd yr ymgynghoriad ar agor i drigolion ar y stryd a effeithir neu safleoedd busnes y gellir ond cael mynediad atynt ar y stryd honno yn unig.
- Os bydd y mwyafrif o’r trigolion yn gefnogol o’r cynnig ar gyfer cynllun parcio i drigolion, bydd yn rhaid i ni gael Gorchymyn Rheoleiddio Traffig i gyflwyno’r cyfyngiadau aros a’r trwyddedau parcio. Gallwch ddarganfod mwy am y broses Gorchymyn Rheoleiddio Traffig yma.
- Mae’r broses Gorchymyn Rheoleiddio Traffig yn ymofyn ymgynghoriad sydd ar agor i bob aelod o’r cyhoedd ac fe allai arwain at wrthwynebiadau gan bobl nad ydynt yn drigolion.
Mae gan y Cyngor yr hawl i beidio â bwrw ymlaen â chynllun parcio i drigolion os yw’r galw am barcio gan drigolion yn llawer uwch na nifer y llefydd parcio sydd ar gael, a fyddai’n gwneud y cynllun yn anymarferol.
Beth yw cyfyngiadau cynllun parcio i drigolion?
Nid yw cynllun parcio trigolion:
- yn sicrhau lle parcio i’r deiliad trwydded y tu allan i’w heiddo neu o fewn y parth cynllun parcio trigolion.
- bob amser yn creu mwy o lefydd parcio. Mewn rhai achosion, mae’n bosibl y bydd nifer y llefydd parcio’n lleihau yn sgil maint safonol baeau parcio.
- yn caniatáu i ddeiliaid trwydded drosglwyddo eu trwyddedau i gerbydau neu aelwydydd eraill, na defnyddio’r drwydded ym mharthau cynllun parcio trigolion eraill.
Mae'n rhaid i ddeiliaid trwydded:
- arddangos trwydded ddilys mewn man amlwg ar y sgrin flaen, gan wneud yn siŵr bod yr holl wybodaeth yn weladwy o’r tu allan. Mae’n drosedd peidio ag arddangos eich trwydded, ac efallai byddwch yn atebol i gael Rhybudd Talu Cosb.
- barcio yn y baeau parcio dynodedig. Os na fyddwch yn gwneud hyn, mae’n bosibl y byddwch yn derbyn Rhybudd Talu Cosb.
Trwyddedau Parcio Blynyddol