Dathlu Wythnos Gwaith Ieuenctid 2026

Dathlu Wythnos Gwaith Ieuenctid 2026

Mae Cyngor Bwrdeistref Sirol Conwy yn cefnogi Wythnos Gwaith Ieuenctid 2026.

Mae’r wythnos yn gyfle i arddangos a dathlu’r rhan hanfodol y mae gwaith ieuenctid yn ei chwarae wrth gefnogi pobl ifanc ar draws y sir.

Rhwng 23 a 30 Mehefin, bydd Gwasanaeth Ieuenctid, Ymgysylltu a Pherthyn Conwy yn hyrwyddo sut y defnyddir chwaraeon anhraddodiadol fel arf pwerus i ymgysylltu â phobl ifanc. Mae’r gweithgareddau hyn yn cael eu defnyddio fel adnoddau effeithiol i ymgysylltu â phobl ifanc, creu cyfleoedd ar gyfer cysylltu, annog sgyrsiau cadarnhaol, a chefnogi eu hiechyd meddwl a’u lles.

Bydd clybiau ieuenctid mynediad agored ac wedi’u targedu ar draws y sir yn cynnig amrywiaeth o weithgareddau creadigol a chynhwysol, gan roi gofodau diogel a chroesawgar i bobl ifanc gysylltu, mynegi eu hunain a datblygu sgiliau newydd.

Bydd yr wythnos hefyd yn tynnu sylw at waith partneriaeth gyda’r Urdd, sy’n rhoi cyfleoedd i bobl ifanc ymgysylltu drwy gyfrwng y Gymraeg a chryfhau eu cysylltiad â’r Gymraeg a diwylliant Cymru.

Meddai’r Cynghorydd Aaron Wynne, Aelod Cabinet Addysg Conwy, sy’n gyfrifol am y Gwasanaeth Ieuenctid, Ymgysylltu a Pherthyn: “Mae gwaith ieuenctid yn chwarae rhan hanfodol wrth gefnogi pobl ifanc ar draws Conwy, gan eu helpu i fagu hyder, datblygu sgiliau newydd ac ymdeimlad o berthyn

“Mae’r Wythnos Gwaith Ieuenctid yn gyfle gwych i ddathlu ymroddiad ein gweithwyr ieuenctid a thynnu sylw at yr effaith gadarnhaol maent yn ei chael bob dydd. Mae hefyd yn gyfle i’n cymunedau weld sut yr ydym yn ymgysylltu â phobl ifanc mewn ffyrdd creadigol ac ystyrlon, yn cynnwys drwy weithgareddau sy’n cefnogi eu lles ac yn eu hannog i ffynnu.”

Anogir preswylwyr, teuluoedd a phartneriaid i gymryd rhan a gweld effaith gadarnhaol gwaith ieuenctid yn ein cymuned.

Am fwy o wybodaeth ac i weld y rhaglen lawn o weithgareddau, ewch i www.facebook.com/GIConwyYS.