Aelodau Cyngor Ieuenctid Conwy yn rhannu eu profiadau

Aelodau Cyngor Ieuenctid Conwy yn rhannu eu profiadau

Aelodau Cyngor Ieuenctid Conwy, Callum Morrissey ac Imogen Griffiths, yn Ysgol Clywedog

Yn ddiweddar, bu i Gadeirydd ac Ysgrifennydd Cyngor Ieuenctid Conwy ymweld ag Ysgol Clywedog yn Wrecsam i’w helpu a’u cefnogi gyda datblygu eu cyngor ysgol.

Roedd y cydweithrediad hwn yn ffordd wych o rannu arferion gorau; gan ddangos i’r arweinwyr-myfyrwyr sut y gallant ddatblygu sgiliau gwaith tîm, arweinyddiaeth a chyfathrebu effeithiol i gynyddu darpariaeth ac allbwn eu cyngor ysgol.

Nod Cyngor Ieuenctid Conwy, sydd ag aelodau rhwng 11 a 18 mlwydd oed, yw helpu i wneud yn siŵr fod gan bob person ifanc lais. Bu arweinwyr-myfyrwyr o Ysgol Clywedog ac aelodau Cyngor Ieuenctid Conwy yn archwilio pynciau megis strwythur, fframwaith, gwerthoedd a sut i greu darpariaeth effeithiol o gamau gweithredu arfaethedig.

Prif nod cydweithio yw gwella cyfranogiad ieuenctid, cynyddu nifer yr arweinwyr myfyrwyr yng nghyngor yr ysgol, a chryfhau lleisiau pobl ifanc yn gyffredinol.

Mae Erthygl 12, Confensiwn y Cenhedloedd Unedig ar Hawliau'r Plentyn yn nodi y dylid gwrando a gweithredu ar farn pobl ifanc. Mae Cyngor Ieuenctid Conwy yn awyddus i weld pob cyngor ysgol yn dilyn strwythur cyson er mwyn caniatáu i bob person ifanc deimlo fel eu bod yn cael eu clywed, eu parchu a’u gwerthfawrogi.

Bu’r grwpiau hefyd yn gweithio gyda ‘Mind Our Future’, elusen iechyd meddwl i bobl ifanc a ariennir gan Gronfa Gymunedol Cronfa Dreftadaeth y Loteri Genedlaethol, sy’n anelu i helpu pobl ifanc gyda’u hiechyd a lles emosiynol a’u grymuso i sicrhau bod eu lleisiau yn cael eu clywed gan ddarparwyr gwasanaethau a’r rhai sy’n gwneud penderfyniadau.

Dywedodd Zac, aelod o Gyngor Ysgol Clywedog: “Daeth Cyngor Ieuenctid Conwy atom i Ysgol Clywedog i gynorthwyo ein cyngor myfyrwyr â’u strwythur, nodau a phrosiectau nesaf ac roedd gennym ddiddordeb mawr yn yr hyn yr oedd ganddynt i’w ddweud. Roedd Cyngor Ieuenctid Conwy o gymorth mawr i’n cyngor myfyrwyr a byddwn yn argymell bod ysgolion eraill yn gwneud yr un fath â ni ac yn cysylltu â Chyngor Ieuenctid Conwy os ydynt yn cael trafferth ag unrhyw beth.”

Mae Gwasanaeth Ieuenctid, Ymgysylltu a Pherthyn Conwy ar gyfer pobl ifanc 11–24 oed sy’n byw yn Sir Conwy. Mae’n darparu amrywiaeth o wasanaethau yn cynnwys clybiau ieuenctid a gweithgareddau, cyfleoedd i wneud Gwobr Dug Caeredin, cymorth i gael gwaith a chyngor am les.

Mae’r gwasanaethau ieuenctid yn ceisio cefnogi pobl ifanc wrth iddyn nhw bontio i fod yn oedolion, gan eu helpu i gyfrannu’n gadarnhaol at eu cymunedau, trwy weithgareddau a pherthnasoedd cadarnhaol.

Gwasanaeth Ymgysylltu a Pherthyn Ieuenctid - Cyngor Bwrdeistref Sirol Conwy