Datblygiad Plas yn Dre

Datblygiad Plas yn Dre

Plas yn Dre

Mae gwaith ar y gweill i ddymchwel hen adeiladau’r llyfrgell a’r orsaf heddlu ym Mhlas yn Dre, Llanrwst.

Mae Cyngor Bwrdeistref Sirol Conwy wedi sicrhau Cyllid Trawsnewid Trefi Llywodraeth Cymru ac wedi dechrau dymchwel y ddau adeilad hen ffasiwn fel rhan o brosiect adfywio ehangach ar gyfer y dref.

Mae safle Plas yn Dre wedi'i nodi fel lleoliad strategol allweddol, gyda photensial cryf ar gyfer datblygiad masnachol, manwerthu, neu ddefnydd cymysg. Mae cael gwared ar yr adeiladau hŷn hyn yn creu cyfle gwerthfawr i ail-ddychmygu'r safle a chefnogi twf economaidd. Bwriad adfywio Plas yn Dre yw helpu i adfywio Llanrwst, denu busnesau newydd, a chryfhau canol y dref.

Mae gwasanaethau llyfrgell, staff y Cyngor, a thimau Heddlu Gogledd Cymru eisoes wedi symud i adeilad Glasdir gerllaw.

Dywedodd y Cynghorydd Sharon Doleman, Aelod Cabinet Economi Gynaliadwy a Chyfathrebu, “Mae hon yn foment bwysig ar gyfer Llanrwst. Mae clirio safle Plas yn Dre yn nodi'r cam cyntaf tuag at ddatgloi ei botensial a chreu cyfleoedd newydd ar gyfer ein cymuned. Gyda chefnogaeth gan raglen Trawsnewid Trefi Llywodraeth Cymru, rydym yn gosod y sylfaen ar gyfer datblygiad a all hybu'r economi leol, denu busnesau newydd ac adfywio canol y dref.”

Dywedodd y Cynghorydd Mike Priestley, Aelod Cabinet yr Amgylchedd, Ffyrdd ac Isadeiledd, “Rydym wedi ymrwymo i wneud y gwaith hwn yn gyfrifol, gydag arolygon ecolegol a mesurau bioamrywiaeth ar waith i amddiffyn bywyd gwyllt lleol. Mae'r prosiect hwn yn ymwneud â llunio dyfodol cadarnhaol i Lanrwst, ac rwy'n falch o'i weld yn symud ymlaen.”

Mae'r gwaith o ddymchwel yr adeilad i fod i gael ei gwblhau ym mis Mawrth 2026.

Ym mis Tachwedd 2025, cymeradwyodd y Cabinet y broses o barhau gyda’r ymgynghoriad cyn gwneud cais cynllunio ar gyfer safle depo newydd ac uwchgynllun datblygu ar gyfer y safle. Dolen: Adroddiad Pwyllgor Plas yn Dre

Mae rhaglen Trawsnewid Trefi yn darparu £100 miliwn i gefnogi adfywiad canol trefi ar draws Cymru. Mae canol trefi a dinasoedd yn parhau i fod yn rhan bwysig o dreftadaeth a bywyd cymunedol Cymru, a nod y rhaglen yw cryfhau'r lleoedd lle mae pobl yn byw, yn gweithio, yn dysgu ac yn treulio amser hamdden.
Dolen: Trawsnewid Trefi: cymorth i wella canol trefi: Rhaglen Trawsnewid Trefi | LLYW.CYMRU