Amlygu perfformiad cadarnhaol llyfrgelloedd Sir Conwy

Amlygu perfformiad cadarnhaol llyfrgelloedd Sir Conwy

Llyfrgell

Bydd adroddiad yn cael ei gyflwyno i Gabinet Conwy yn ei gyfarfod nesaf, yn amlygu perfformiad cadarn Gwasanaeth Llyfrgelloedd a Gwybodaeth y Cyngor. 

Mae manylion ynghylch perfformiad y Gwasanaeth Llyfrgelloedd yn Asesiad Safonau Llyfrgelloedd Cyhoeddus Cymru 2024-25, a gyhoeddwyd gan Lywodraeth Cymru. Caiff adroddiadau Safonau Llyfrgelloedd Cyhoeddus Cymru eu cyhoeddi bob blwyddyn. 

Mae Adroddiad 2024-2025 yn dangos bod Conwy yn bodloni pob un o’r 13 Hawl Craidd yn llawn. Yn ogystal, o'r pum Dangosydd Ansawdd sydd â thargedau, cyflawnodd y Gwasanaeth Llyfrgell bedwar yn llawn ac un yn rhannol.

Roedd adroddiad Safonau Llyfrgelloedd Cyhoeddus Cymru yn dangos cryfderau’r Gwasanaeth Llyfrgelloedd, gan gynnwys y cynnydd o ran niferoedd sy’n mynychu digwyddiadau a gweithgareddau a gynhelir mewn Llyfrgelloedd a’r effaith ar raglenni cymunedol llyfrgelloedd. Mae llyfrgelloedd Conwy yn darparu rhaglen amrywiol o weithgareddau, gan gynnwys grwpiau darllen ar y cyd a sesiynau ffrindiau darllen sy’n addas i bobl â dementia, yn ogystal â sesiynau sy’n canolbwyntio ar les i blant a theuluoedd. 

Meddai’r Cynghorydd Dilwyn Roberts, Aelod Cabinet Diwylliant, Hamdden a Gwasanaethau Llywodraethu Cyngor Bwrdeistref Sirol Conwy, “Hoffwn ddiolch i aelodau staff ein llyfrgelloedd am eu hymrwymiad i gyflawni’r safonau uchel hyn, a’u gwasanaeth rhagorol i gwsmeriaid. Mae’n braf iawn gweld y dystiolaeth bod ein llyfrgelloedd yn gallu gweithredu fel canolbwyntiau cymunedol, sy’n darparu ystod eang o wasanaethau a gweithgareddau, ymrwymiad allweddol o ran canlyniadau’r dinesydd yn ein Cynllun Corfforaethol.

“Rydym yn cydnabod bod yna heriau a phwysau ariannol parhaus, ond mae ein hymrwymiad i gynnal ein horiau agor a diogelu’r ddarpariaeth yn y rheng flaen yn dangos mor bwysig ydi ein llyfrgelloedd i ni ac mor fuddiol ydyn nhw i’n preswylwyr.”

Caiff yr adroddiad ei gyflwyno i’r Cabinet yn y cyfarfod ar 24 Chwefror Democratiaeth Leol Conwy : Rhaglen y Cabinet ddydd Mawrth, 24 Chwefror 2026, 2.00 pm https://modgovpub-cym.secure.conwy.gov.uk/ieListDocuments.aspx?CId=171&MId=10794&Ver=4

Nodyn:

Mae’r Dangosyddion Ansawdd fel a ganlyn: 

Cefnogi Iechyd a Lles (Dangosydd Ansawdd 4 - wedi’i fodloni’n llawn)

Digwyddiadau / gweithgareddau i ddefnyddwyr â gofynion arbennig (Dangosydd Ansawdd 6 - wedi’i fodloni’n llawn)

Lleoliad mannau gwasanaeth (Dangosydd Ansawdd 7 - wedi’i fodloni’n llawn)  

Cymwysterau a lefelau staffio (Dangosydd Ansawdd 13 - wedi’i fodloni’n rhannol)

Oriau agor y pen (Dangosydd Ansawdd 16 – wedi’i fodloni’n llawn)