Ynglŷn â’r ymgynghoriad hwn
Yn 2022, cyhoeddodd Conwy gynllun corfforaethol pum mlynedd o hyd i fynd i’r afael â’r argyfwng hinsawdd byd-eang. Nod y cynllun yw lleihau allyriadau carbon, addasu i newid hinsawdd a’i liniaru, a sicrhau effeithiau cadarnhaol ar yr hinsawdd. Yn rhan o’r ymdrech hon, mae Conwy’n canolbwyntio ar leihau gwastraff ac ailddefnyddio, trwsio ac ailgylchu mwy gyda Strategaeth Adnoddau a Gwastraff newydd.
Dros y blynyddoedd diwethaf, rydym ni wedi gwneud cynnydd arbennig ac wedi bwrw iddi i gefnogi preswylwyr a busnesau i ailgylchu mwy o’u gwastraff a gwneud penderfyniadau doeth am leihau eu gwastraff, galluogi trwsio ac ailgylchu mwy.
Rydym ni bob amser yn edrych i’r dyfodol i sicrhau bod ein gwasanaethau’n gallu bodloni anghenion ein preswylwyr, a gwneud gwelliannau, ond mae’n rhaid paratoi at yr heriau canlynol hefyd:
- Argyfwng hinsawdd byd-eang a lleihau ein hallyriadau nwyon tŷ gwydr i sero net
- Cyrraedd targedau ailgylchu mae Llywodraeth Cymru wedi’u gosod trwy gynyddu ein cyfradd ailgylchu i 70%
- Newidiadau polisi a fydd yn cefnogi ailgylchu ac ailddefnyddio mwy a lleihau allyriadau nwyon tŷ gwydr
- Taro cydbwysedd rhwng cyfyngiadau ar gyllidebau
- Sicrhau bod yr isadeiledd gwastraff yn gallu ymdopi â chasglu mwy o wastraff ailgylchu a chyrraedd y targed carbon sero net mae Llywodraeth Cymru wedi’i osod erbyn 2050
Mae ein Strategaeth Adnoddau a Gwastraff 2026-2031 ddrafft wedi’i datblygu i ymateb i’r heriau hyn a cheisio dod o hyd i gyfleoedd. O fewn y strategaeth, rydym wedi nodi chwech o amcanion allweddol, sef:
- Lleihau gwastraff ac annog pobl i ailddefnyddio mwy
- Cynyddu cyfraddau ailgylchu
- Darparu gwasanaeth gwydn, effeithiol, sy’n cael ei redeg yn dda ar gyfer preswylwyr a busnesau yng Nghonwy
- Cefnogi uchelgeisiau datgarboneiddio’r Cyngor
- Paratoi ein gwasanaeth at y dyfodol, a’r isadeiledd sy’n ategu’r gwasanaeth gwastraff ac ailgylchu
- Cyfathrebu, ymgysylltu ac addysg
Rydym ni’n awyddus i glywed eich barn chi am flaenoriaethau ein strategaeth a fydd yn helpu i ffurfio’r ddogfen strategaeth derfynol.
Cyn cymryd rhan yn yr ymgynghoriad, darllenwch Gopi Drafft y Strategaeth Adnoddau a Gwastraff 2026-2031 (dogfen PDF).
Mae’r ddogfen hon yn darparu mwy o fanylion am gyd-destun y strategaeth a’r camau gweithredu rydym ni’n eu cynnig i fynd i’r afael â’r heriau sy’n ein hwynebu, a darparu gwasanaeth sy’n addas at y dyfodol.
Daw’r ymgynghoriad hwn i ben ar 5 Hydref.