Ymgynghoriad ar Ardoll Ymwelwyr ar agor

Ymgynghoriad ar Ardoll Ymwelwyr ar agor

Ymgynghoriad ar Ardoll Ymwelwyr

Mae Cyngor Bwrdeistref Sirol Conwy yn gofyn i bobl gyflwyno eu barn am gyflwyno ardoll ar arosiadau dros nos mewn llety i ymwelwyr. 

Dywedodd y Cynghorydd Sharon Doleman, Aelod Cabinet Economi Gynaliadwy a Chyfathrebu: “Rydym yn gwybod bod cryn ddiddordeb yn yr Ardoll Ymwelwyr yng Nghonwy, a dyna pam rydym wedi cyflogi cwmni annibynnol i gynnal ymgynghoriad i fesur y farn leol.”  Bydd yr ymatebion a gawn yn helpu Cynghorwyr i wneud penderfyniad democrataidd deallus am y mater pwysig hwn.”

Mae’r manylion llawn a’r holiadur ar gael ar-lein: Ymgynghoriad arfaethedig ar y dreth ymwelwyr yn Sir Conwy - Cyngor Bwrdeistref Sirol Conwy

Mae sesiynau galw heibio a digwyddiadau yn cael eu trefnu ar gyfer y cyhoedd ac ar gyfer y sector lletygarwch. Cyhoeddir manylion y rhain yn fuan. 

Os nad oes gennych chi fynediad at y rhyngrwyd, gallwch gael copi papur o’r lleoedd canlynol:

• Canolfan Groeso Conwy, Adeiladau’r Muriau, Rose Hill Street, Conwy LL32 8LD
• Gwasanaeth Canolfan Groeso Llandudno, Venue Cymru, Y Promenâd, Llandudno, LL30 1BB
• Canolfan Fusnes Conwy, Lôn y Gyffordd, Cyffordd Llandudno, LL31 9XX
• Coed Pella, Ffordd Conwy, Bae Colwyn, LL29 7AZ
• Llyfrgelloedd

Bydd yr ymgynghoriad yn para ychydig mwy nag 8 wythnos. A fyddech cystal â chyflwyno’ch safbwyntiau erbyn 17/07/26.

Bydd canlyniadau'r ymgynghoriad yn cael eu cyflwyno i Gynghorwyr yn ddiweddarach eleni pan fyddant yn trafod a ddylid cyflwyno Ardoll Ymwelwyr yn Sir Conwy.

Cefndir

Yn 2024, cyhoeddodd Llywodraeth Cymru Fil Llety Ymwelwyr (Cofrestr ac Ardoll) Etc. (Cymru).  Cymeradwywyd y Bil gan Senedd Cymru ar 8 Gorffennaf 2025 a derbyniodd Gydsyniad Brenhinol ar 18 Medi 2025.

Mae'r Bil yn rhoi'r dewis i awdurdodau lleol gyflwyno ardoll ar arosiadau dros nos mewn llety ymwelwyr. 

Mae cynnal ymgynghoriad yn rhan o'r broses a rhaid ei wneud cyn gofyn i Gynghorwyr benderfynu a ddylid cyflwyno ardoll ai peidio.

Yng Nghyfarfod Cyffredinol Blynyddol y Cyngor ar 14/05/26, rhoddodd y Cynghorwyr ganiatâd i gynnal ymgynghoriad.

Cwestiynau Cyffredin:

Preswylwyr ac Ymwelwyr: Ardoll Ymwelwyr
Busnes Lletygarwch: Gwybodaeth i Fusnesau am yr Ardoll Ymwelwyr