Pobl Ifanc yn Meithrin Sgiliau Arwain yn Nigwyddiad Rhwydweithio Cynghorau Ieuenctid Gogledd Cymru

Pobl Ifanc yn Meithrin Sgiliau Arwain yn Nigwyddiad Rhwydweithio Cynghorau Ieuenctid Gogledd Cymru

Rhwydweithio Cynghorau Ieuenctid Gogledd Cymru

Daeth tri deg o aelodau Cynghorau Ieuenctid ledled Gogledd Cymru ynghyd ar gyfer pedwerydd cyfarfod Rhwydweithio Cynghorau Ieuenctid Gogledd Cymru yr wythnos yma (26/10/26). Cafodd y digwyddiad ei gynnal gan Gyngor Ieuenctid Conwy yn swyddfeydd Cyngor Bwrdeistref Sirol Conwy yng Nghoed Pella ym Mae Colwyn.

Roedd wedi’i gynllunio’n arbennig ar gyfer aelodau’r Cynghorau Ieuenctid o bob un o chwe awdurdod Gogledd Cymru a chafodd ei gynnal ar y cyd â Bwrdd Iechyd Prifysgol Betsi Cadwaladr.

Drwy gydol y diwrnod, bu’r bobl ifanc yn cymryd rhan mewn gweithgareddau rhyngweithiol, trafodaethau a dysgu ar ffurf ffilmiau, gan edrych ar faterion maen nhw’n angerddol yn eu cylch a thrafod y newidiadau yr hoffent eu gweld yn eu cymunedau nhw a thu hwnt. Gan weithio mewn parau neu grwpiau bach, bu’r bobl ifanc yn ystyried pam mae’r materion hynny’n bwysig iddynt a sut mae modd mynegi eu neges yn effeithiol.

Roedd yr hyfforddiant yn cyflwyno’r bobl ifanc i ‘Public Narrative’, sy’n ddull arweinyddiaeth a dylanwadu a ddatblygwyd ym Mhrifysgol Harvard. Mae’r dechneg yn helpu unigolion i ddefnyddio’u profiadau a’u gwerthoedd eu hunain i adrodd straeon cymhellgar sy’n ysbrydoli eraill, yn meithrin cysylltiadau, ac yn annog gweithredu ar faterion sy’n bwysig iddyn nhw.

Anogwyd y bobl ifanc i fynegi eu syniadau mewn amryw ffyrdd, gan gynnwys darnau ysgrifenedig, byrddau stori, a gwaith celf, a oedd yn caniatáu iddynt ddewis y fformat oedd yn gweddu orau i’w cryfderau a’u diddordebau. Erbyn diwedd y sesiwn, roeddent wedi dechrau datblygu eu ‘naratifau cyhoeddus’ eu hunain, gan greu straeon arwain oedd wedi’u bwriadu i ysbrydoli gweithredu a dylanwadu ar newid.

Roedd yr hyfforddiant hefyd yn cyflwyno technegau hyfforddi ymarferol, a oedd yn helpu’r bobl ifanc i ddysgu sut i gefnogi ac annog ei gilydd fel arweinwyr yn eu cynghorau ieuenctid lleol a’u cymunedau.

Roedd y digwyddiad yn amlygu ymrwymiad cynghorau ieuenctid ar draws Gogledd Cymru i fuddsoddi a datblygu arweinyddiaeth ymysg pobl ifanc, gan sicrhau bod y sgiliau, yr hyder a’r gefnogaeth angenrheidiol ganddynt i fod yn eiriolwyr effeithiol dros y materion sydd bwysicaf i’w cenhedlaeth nhw.

Mae Cynghorau Ieuenctid yn rhoi cyfle i bobl ifanc 11–18 oed drafod materion sy’n effeithio ar eu cymunedau a lleisio eu barn wrth rai sy’n gwneud penderfyniadau mewn llywodraeth leol a chenedlaethol. Gall cynrychiolwyr o Gyngor Ieuenctid Conwy gymryd rhan mewn cyfarfodydd Craffu a bod yn rhan o’r broses ddemocrataidd yng Nghyngor Bwrdeistref Sirol Conwy.

Am fwy o wybodaeth am Gyngor Ieuenctid Conwy, ewch i: Gwasanaeth Ieuenctid, Ymgysylltu a Pherthyn – Cyngor Bwrdeistref Sirol Conwy