Fforwm Mynediad Lleol Dwyrain Conwy a Sir Ddinbych

start content

Mae Cyngor Bwrdeistref Sirol Conwy a Chyngor Sir Ddinbych yn falch o gyhoeddi eu bod yn cydweithio i sefydlu Fforwm Mynediad Lleol Dwyrain Conwy a Sir Ddinbych ar gyfer 2023/24. Bydd y fforwm newydd hwn yn dod ag unigolion ynghyd o’r gymuned leol i gynrychioli ystod eang o ddiddordebau a fydd yn rhoi cyngor strategol i’r Gwasanaethau Hawliau Tramwy a Chefn Gwlad.

Bydd y Fforwm yn anelu i gynnwys 12 i 20 o wirfoddolwyr, a fydd yn helpu’r Cyngor i wella mynediad i gefn gwlad a chyfleoedd hamdden awyr agored i bawb.

Bydd aelodaeth yn cael ei dethol o amrywiaeth o ddiddordebau, gan dargedu cyfraniad gan y rhai sy’n defnyddio cefn gwlad a’r rhai sy’n ei reoli. Yn ystod cyfarfodydd, bydd aelodau yn cymryd rhan mewn trafodaethau adeiladol ac yn ceisio cytundeb wrth wneud penderfyniadau a rhoi cyngor.

Bydd aelodaeth yn targedu cynrychiolwyr o:

Ffermwyr a pherchnogion tir
Cymdeithas y Cerddwyr a grwpiau diddordeb mynediad eraill
Yr Ymddiriedolaeth Genedlaethol ac elusennau cadwraeth eraill
Reidwyr llwybrau
Sefydliadau ffermio a Chynghorau Tref a Chymuned
Cymdeithas Geffylau Prydain a sefydliadau cysylltiedig eraill
SUSTRANS
Defnyddwyr anabl
Cynghorwyr Sir
Cynrychiolwyr cymunedol sydd â diddordeb mewn hamdden a mynediad i gefn gwlad

Beth yw nodau ac amcanion y fforwm?

Cefnogi a chynghori’r Cynghorau, Cyfoeth Naturiol Cymru a Llywodraeth Cymru ar dir mynediad agored yng Nghonwy a Sir Ddinbych ac ystyried ceisiadau ar gyfer cyfyngiadau neu gau mynediad ar gyfer rheolaeth neu gadwraeth tir.
Cynorthwyo gyda chyngor ar wella a datblygu’r rhwydweithiau hawliau tramwy sy’n bodoli ac adnabod unrhyw gysylltiadau coll.
Rhoi cyngor ar Gynlluniau Gwella Hawliau Tramwy’r siroedd a strategaethau hamdden a mynediad eraill.
Llywio a monitro gweithrediad Cynlluniau Gwella Hawliau Tramwy i sicrhau rhwydwaith integredig sy’n bodloni anghenion defnyddwyr heddiw ac yn y dyfodol.
Cydbwyso anghenion defnyddwyr mynediad gyda rheoli tir ac anghenion cadwraeth ardal.
Paratoi adroddiad blynyddol o’i weithgareddau.
Ymateb i ymgynghoriadau’r Llywodraeth ar reoli mynediad.
Cynrychioli’r Cynghorau mewn Fforymau Mynediad Lleol rhanbarthol.

Ffurflen gais aelodaeth

Gwnewch gais i ddod yn aelod

Beth sy’n digwydd yn y cyfamser?

Bydd Conwy a Sir Ddinbych yn ailgychwyn y cyn Fforwm Mynediad Lleol yn ystod Mawrth 2023. Trefnir cyfres o gyfarfodydd i groesawu aelodau o’r cyn CEDLAF i ailymuno a chwrdd â Gwasanaethau Hawliau Tramwy a Chefn Gwlad ar draws Conwy a Sir Ddinbych yn ystod 2023, tra bod Fforwm Mynediad Lleol newydd 2023/24 yn cael ei greu.

Byddwn yn anfon gwahoddiadau at aelodau CEDLAF yn ystod Chwefror 2023.