Manylion yr ymgynghoriad
Cynhaliwyd yr ymgynghoriad ar drefn y ffyrdd a gwelliannau i’r promenâd o ddydd Gwener 26 Awst i ddydd Gwener 9 Medi, gyda fersiwn ar-lein a phedwar diwrnod agored i’r cyhoedd yn swyddfa’r safle ar bromenâd Llandrillo-yn-Rhos.
Roedd deunyddiau’r ymgynghoriad yn egluro’r rhesymau dros gynnig newidiadau i drefn y ffyrdd, gan roi gwybodaeth ar agweddau budd cymunedol y cynllun sydd angen promenâd lletach. Mae’r rhain yn cynnwys ardaloedd chwarae, gwelliannau i ddiogelwch y ffordd, llwybr i gerddwyr yn unig, gwell llwybr Teithio Llesol a gwelliannau iechyd a hamdden.
Roedd gwybodaeth yr ymgynghoriad yn cynnwys adolygiad o’r dewisiadau trefn ffyrdd oedd ar y rhestr hir a’r rhestr fer ar gyfer eu hystyried gan y tîm prosiect, yn cynnwys dewisiadau a awgrymwyd gan y gymuned. Cafodd pob dewis oedd ar y rhestr fer eu hasesu o ran effaith gymdeithasol, effaith ar gerddwyr a beicwyr, effaith ar gerbydau a chludiant cyhoeddus a’r effaith ar yr amgylchedd.
Rhoddodd yr ymgynghoriad gyfle i’r gymuned ystyried y cynigion o ran trefn y ffyrdd yng nghyd-destun y cynllun cyfan. Gan gydnabod yr ystod o safbwyntiau, gofynnwyd i breswylwyr roi adborth ar yr hyn oedd yn bwysig iddynt.
Ymatebion i'r ymgynghoriad
Cyflwynwyd 390 o ymatebion yn y dyddiau agored i’r cyhoedd a 304 drwy ein hymgynghoriad ar-lein. Mae hyn yn gyfanswm o 694 o ymatebion ffurfiol i’r ymgynghoriad.
Rhoddodd y ffurflenni adborth gyfle i bobl ddweud wrthym pa mor bwysig oedd agweddau o’r cynllun iddynt. Rhoddwyd sgôr allan o 10 i bob agwedd, 10 yn bwysig iawn a 0 ddim yn bwysig o gwbl.
Rydym wedi cyfuno’r adborth ac wedi gosod yr agweddau yn ôl y sgôr gyfartalog a gawsant:
- Llwybr i gerddwyr yn unig ar hyd y wal fôr
- Llwybr Teithio Llesol gwell
- Manteision hamdden ac iechyd newydd
- Mannau parcio diogel yn agos i’r traeth
- Effaith y cynllun traffig newydd ar Bromenâd y Cayley
- Y celfyddydau a diwylliant
- Promenâd y gorllewin yn parhau’n ddwyffordd i draffig
- Mannau chwarae
Fe wnaethom ofyn i bobl roi sylwadau ar drefn y ffyrdd a gwelliannau i’r promenâd hefyd. Dywedodd rhai pobl eu bod yn bryderus am ddiogelwch a goblygiadau ar lif traffig wrth symud rhywfaint o’r traffig o Bromenâd y Gorllewin i fyny at Bromenâd y Cayley.
Ymhlith yr adborth arall a gafwyd oedd cais am doiledau cyhoeddus a chawod neu le golchi traed ar y traeth.
Mae’r tîm prosiect wedi ystyried yr holl adborth a roddwyd a byddant yn edrych ar welliannau a awgrymwyd i’r cynlluniau.
Y camau nesaf
Bydd adroddiad yn mynd gerbron Cabinet y Cyngor ar 8 Tachwedd i benderfynu ar gynllun terfynol. Wedi hyn, bydd ar rai newidiadau, megis llinellau melyn dwbl, angen Gorchymyn Rheoleiddio Traffig cyn y gall y gwaith ddechrau.