Gofal Plant a Ariennir gan Lywodraeth Cymru i Blant 2 Oed

Mae Conwy’n ymrwymo i gefnogi teuluoedd i sicrhau fod plant bach yn cael y dechrau gorau posib mewn bywyd.

Beth yw manteision Gofal Plant a Ariennir gan Lywodraeth Cymru i Blant 2 Oed?

Mae Gofal Plant a Ariennir gan Lywodraeth Cymru i Blant 2 Oed yn cynnig lle diogel, gofalgar a hwyliog i blant ddysgu, datblygu a ffynnu. Mae ein darparwyr gofal plant yn meddu ar y profiad a’r cymwysterau angenrheidiol ac yn rhoi lles eich plentyn wrth wraidd popeth y maent yn ei wneud.

Nid yw gofal plant yn orfodol, ond pan fyddwch chi’n ei ddefnyddio, gwyddom eich bod eisiau’r ddarpariaeth orau bosib i’ch teulu chi.

Bydd plant yn cael cyfle i:

• Ddysgu sgiliau newydd
• Magu hyder
• Teimlo’n ddiogel a hapus
• Ymchwilio i’w diddordebau
• Dod yn fwy annibynnol
• Gwneud ffrindiau
• Mwynhau gweithgareddau dan do ac yn yr awyr agored

Mae plant cymwys yn gallu cael hyd at 12½ awr o ofal plant wedi’i ariannu yn ystod y tymor.

Darperir y gofal fel hyn gan amlaf:

• 2½ awr y diwrnod
• Dydd Llun i ddydd Gwener
• Yn ystod y tymor yn unig

Pwy all gael Gofal Plant a Ariennir gan Lywodraeth Cymru i Blant 2 Oed?

Mae plant yn gymwys i ddechrau cael y gofal hwn yn y tymor ysgol yn dilyn eu pen-blwydd yn 2 oed hyd at y tymor ysgol ar ôl eu pen-blwydd yn 3 oed, a hynny mewn lleoliad gofal plant a gymeradwywyd yng Nghonwy.

I fod yn gymwys rhaid i’ch plentyn fod yn byw yn Sir Conwy, rhaid i hyn fod:

• yn brif gyfeiriad cartref y plentyn
• y cyfeiriad y telir eu budd-dal plant iddo (os ydynt yn gymwys)
• y cyfeiriad a gofrestrwyd gydag ymwelydd iechyd y plentyn.
  
  

Ble mae Gofal Plant a Ariennir gan Lywodraeth Cymru i Blant 2 Oed ar gael?

Mae’r gofal plant a ariennir ar gael ym mhob rhan o Sir Conwy.

Dim ond lleoedd mewn lleoliadau gofal plant sydd wedi’u cymeradwyo y gellir eu hariannu. Mae’r lleoliadau hynny wedi bodloni safonau ansawdd a chael sêl bendith Dechrau’n Deg Conwy.

Ymysg y lleoliadau sydd wedi'u cymeradwyo mae:

• Cylchoedd Chwarae
• Cylchoedd Meithrin
• Meithrinfeydd Dydd
• Gwarchodwyr Plant.
  
  

Mae hynny’n cynnwys darparwyr gofal plant Cymraeg, Saesneg a dwyieithog.

 
Os nad yw eich darparwr gofal plant presennol yn y rhestr o leoliadau sydd wedi'u cymeradwyo, ni allwn ariannu gofal plant yno ar hyn o bryd.

Gallwch siarad â’ch darparwr gofal plant yngln â dod yn lleoliad wedi’i gymeradwyo.

Sut i wneud cais?

Mae’r dyddiad y bydd eich plentyn yn dechrau’n dibynnu ar eu dyddiad geni.

Os oes gan eich plentyn ddyddiad geni cymwys ac mae'n byw yn Sir Conwy, bydd angen i chi lenwi ffurflenni cofrestru.

I wneud hynny, dewch i un o sesiynau galw heibio Gofal Plant:

Os na fedrwch ddod i un o’r sesiynau hyn, cysylltwch â ni i drefnu amser arall i lenwi ffurflenni cofrestru Dechrau’n Deg.

Beth fydd yn digwydd nesaf?

Ar ôl prosesu’ch cais, bydd Tîm Gofal Plant Dechrau’n Deg Conwy’n anfon neges e-bost neu lythyr i gadarnhau.

Ni all y gofal plant wedi’i ariannu ddechrau nes y byddwch chi wedi cael y cadarnhad hwnnw.

Bydd y cadarnhad yn cynnwys:

• dyddiad dechrau ariannu gofal eich plentyn
• yr oriau y cytunwyd eu hariannu
• y lleoliad gofal plant y trefnwyd lle i’ch plentyn ynddo
  
  

Atebion i Gwestiynau Cyffredin

Faint o oriau wedi’u hariannu a fedr fy mhlentyn eu cael?

Gall plant cymwys gael hyd at 12½ awr yr wythnos, fel arfer 2½ awr y diwrnod, o dydd Llun i ddydd Gwener yn ystod y tymor.

Efallai y bydd y trefniadau’n amrywio mewn gwahanol leoliadau gofal plant.

Pa leoliadau gofal plant all dderbyn cyllid Gofal Plant a Ariennir gan Lywodraeth Cymru i Blant 2 Oed?

Dim ond lleoedd mewn lleoliadau gofal plant sydd wedi’u cymeradwyo y gellir eu hariannu.

Mae rhestr o’r holl leoliadau sydd wedi’u cymeradwyo i’w gweld uchod.

Beth sy’n digwydd os yw fy mhlentyn yn mynychu mwy nag un lleoliad?

Dim ond i un lleoliad gofal plant y gellir talu cyllid Gofal Plant a Ariennir gan Lywodraeth Cymru i Blant 2 Oed.

Wrth wneud cais, dewiswch y lleoliad yr hoffech chi i'ch plentyn ei fynychu gyda’r cyllid.

Alla'i newid yr oriau a ariennir?

Os hoffech chi newid yr oriau a ariennir, newid y lleoliad gofal plant neu ddod â lle i ben yn gynnar, bydd angen i chi drafod hynny gyda’ch darparwr gofal plant, a rhaid i dîm gofal plant Dechrau'n Deg Conwy gytuno i hyn. Gellir newid oriau neu leoliadau ar gyfer yr hanner tymor sy’n dilyn – nid oes modd gwneud newidiadau yn ystod yr hanner tymor cyfredol.

A fydd hyn yn effeithio ar fy mudd-daliadau?

Efallai y bydd angen ichi roi gwybod i’r Adran Gwaith a Phensiynau os ydych chi’n derbyn budd-dal ar gyfer gofal plant, gan gynnwys Credyd Cynhwysol.

Hysbysiad Preifatrwydd

Os ydych yn cael gwasanaethau gan Ddechrau’n Deg, bydd rhywfaint o’r wybodaeth rydym yn ei chasglu amdanoch yn cael ei rhannu â Llywodraeth Cymru bob blwyddyn. Mae mwy o wybodaeth am sut mae eich data’n cael ei ddefnyddio a’i gadw yn hysbysiad preifatrwydd Dechrau’n Deg Llywodraeth Cymru. Gallwch hefyd weld hysbysiad preifatrwydd Conwy mewn fformat Hawdd ei Ddeall.

Angen Mwy o Wybodaeth?

Gofal Plant Dechrau’n Deg Conwy

Ebost: dd-gofalplant@conwy.gov.uk
Ffon: 01492 575453 / 01492 575784

Gwasanaeth Gwybodaeth i Deuluoedd Conwy

Ebost: plant.children@conwy.gov.uk
Ffon: 01492 577850