Os ydych chi’n defnyddio eich eiddo ar gyfer busnes, un ai yn ei osod fel llety gwyliau, llety hunanarlwyo neu os ydych yn rhedeg tŷ gwesty, mae’n rhaid i chi fod â gwasanaeth casglu gwastraff masnachol.
Mae Rheoliadau Gwastraff a Reolir (Cymru a Lloegr) 2012 yn nodi na chaniateir i lety gwyliau a llety hunanarlwyo ddefnyddio gwasanaeth casglu gwastraff ac ailgylchu ymyl palmant y Cyngor lleol. Y rheswm am hyn yw am fod gwastraff o eiddo a ddefnyddir ar gyfer busnes yn cael ei ddosbarthu fel gwastraff masnachol. Felly mae angen i chi fod â chontract gwastraff masnachol.
Nid oes gwahaniaeth os ydych wedi cofrestru ar gyfer trethi busnes na faint o ddiwrnodau mae’r eiddo ar gael i westeion. Os yw eich eiddo wedi ei gofrestru ar gyfer cyfraddau busnes (ardrethi annomestig cenedlaethol) nid yw hwn yn cynnwys casglu a gwaredu gwastraff masnachol.
Mae’r Cyngor yn cynnig ystod o gasgliadau ailgylchu a gwastraff masnachol sy’n fforddiadwy. Rydym yn codi tâl fesul casgliad yn unig. Mae’r costau hyn yn cynnwys y biniau eu hunain, eich dogfennau Dyletswydd Gofal, a dosbarthu’r biniau ar y cychwyn. Nid oes unrhyw gostau cudd ac nid oes TAW.
Os byddwch yn dewis defnyddio darparwr gwahanol, mae’r gyfraith yn nodi bod yn rhaid i chi brofi fod gennych drefniadau casglu gwastraff priodol mewn grym.