Gofalwr yw rhywun sy’n darparu neu’n bwriadu darparu gofal di-dâl i oedolyn neu blentyn anabl. Gall Gofalwyr fod o unrhyw oed ac nid oes raid iddynt fyw gyda'r unigolyn y maent yn gofalu amdanynt.
Mae nifer o ofalwyr di-dâl yn berthnasau, ffrindiau neu’n gymdogion i’r bobl y maent yn gofalu amdanynt ac efallai nad ydynt yn ystyried eu hunain fel gofalwyr, er eu bod wedi bod yn gofalu am rywun ers amser hir. Mae’n gallu bod yn anodd cadw eich rôl fel gofalwr a’ch perthynas gyda’r unigolyn yr ydych yn gofalu amdanynt ar wahân.
Mae bod yn ofalwr yn gallu bod yn hynod wobrwyol ond ar adegau gall fod yn llethol ac anodd. Gallai hyn eich atal rhag byw eich bywyd fel y dymunwch, fel cael swydd, treulio amser gyda ffrindiau, mwynhau diddordebau neu dalu eich biliau.
Dod o hyd i gymorth
Os ydych chi’n ofalwr di-dâl, efallai eich bod yn teimlo’n unig, yn flinedig ac yn emosiynol, a’ch bod angen cymorth a chefnogaeth gyda’ch arian.
Eich rhwydwaith cymorth
A ydych chi wedi ystyried y rhwydwaith cymorth o’ch cwmpas?
Rydym yn aml yn anghofio gofyn am gymorth gan deulu a ffrindiau. Efallai nad ydym eisiau eu poeni, ond yn amlach na pheidio dyma’r bobl sy’n eich adnabod chi a’r unigolyn yr ydych yn gofalu amdanynt orau. Defnyddiwch y rhai sydd o’ch cwmpas i’ch cefnogi a’ch cynorthwyo. A oes aelod o’r teulu neu gyfaill agos sy’n gallu helpu er mwyn i chi gael seibiant, neu helpu i fynd â’r unigolyn yr ydych yn gofalu amdanynt i apwyntiad?
Eich Meddyg Teulu
A ydych wedi siarad â’ch meddyg teulu i geisio arweiniad ynglŷn ag unrhyw anghenion iechyd sydd gan yr unigolyn yr ydych yn gofalu amdanynt?
Gall eich Meddyg Teulu eich atgyfeirio at gwnsela os ydych chi’n teimlo y byddai hyn o fudd i chi. Gall darparu cymorth gofal i rywun gael effaith arnoch chi a’ch lles emosiynol.
Gwasanaethau cefnogi, cyngor a gwybodaeth
- Mae Adferiad yn darparu gwasanaethau i bobl sydd wedi’u heffeithio gan iechyd meddwl gwael, defnydd o gyffuriau ac alcohol, gamblo neu amgylchiadau heriol eraill.
- Os ydych chi neu’r unigolyn yr ydych yn gofalu amdanynt yn niwrowahanol, darganfyddwch pa gefnogaeth sydd ar gael i chi.
- Mae Cymdeithas Alzheimer’s yn cynnig amrywiaeth o wasanaethau i bobl â dementia a’u gofalwyr. Cysylltwch â’r tîm lleol ar 01492 546870.
- Bwrdd Iechyd Prifysgol Betsi Cadwaladr.
- Gall y Groes Goch Brydeinig ddarparu cefnogaeth ymarferol, leol ac emosiynol. Cysylltwch â nhw ar 0844 871 8000.
- Gall y Gwasanaeth Cynnal Gofalwyr eich helpu i gael mynediad at y cymorth a’r gefnogaeth sydd eu hangen arnoch. Cysylltwch â’r tîm lleol ar 01492 533714.
- Mae Ymddiriedolaeth Gofalwyr Gogledd Cymru - Gwasanaethau Gofal Croesffyrdd yn darparu ystod o wasanaethau i ofalwyr yng Nghonwy. Efallai y gallant eich cynghori a’ch cefnogi gyda seibiant, er mwyn i chi gael amser i ffwrdd o’ch cyfrifoldebau gofalu. Cysylltwch â nhw ar 01492 542212.
- Mae Carents Room yn sefydliad sy’n cefnogi plant sy’n oedolion ac yn gofalu am eu rhieni hŷn.
- Mae Gofalwyr Cymru yn darparu gwybodaeth, cyngor a chefnogaeth arbenigol i ofalwyr di-dâl ac yn ymgyrchu i wella bywydau gofalwyr. Gallwch fynychu sesiynau Amser i Mi i gael gwybodaeth am eich hawliau a chymorth gyda’ch lles, awgrymiadau ar sut i orffwys ac ymlacio, ac arweiniad ar sut i sicrhau cydbwysedd rhwng gwaith â thâl a gofalu am rywun.
- Gall Cyngor ar Bopeth eich helpu i nodi’r cymorth a’r gefnogaeth y mae gennych hawl iddynt.
- Gall Cefnogaeth Gymunedol a Gwirfoddol Conwy ddarparu ystod eang o wybodaeth, canllawiau a chefnogaeth a gynigir gan y sector gwirfoddol a chymunedol a sut y gallai helpu eich lles.
- Mae Cyswllt Conwy ar gyfer Anableddau Dysgu yn sefydliad sy’n cael ei arwain gan aelodau ledled Gogledd Cymru. Yn ogystal â threfnu gweithgareddau ar gyfer pobl o bob oed, mae ganddynt brosiectau pontio, iechyd, ymgysylltu a hunan-eiriolaeth. Cysylltwch â nhw ar 01492 536486.
- Gallwch ddysgu mwy am sefydliadau a gwasanaethau lleol a gynigir yng Nghonwy ar wefan Dewis.
- Mae Cymdeithas Syndrom Down yn cefnogi pobl sydd â Syndrom Down, eu rhieni a’u gofalwyr. Ffoniwch y tîm lleol ar 01492 621066.
- Mae gwefan GOV.UK yn eich helpu i nodi’r buddion a’r gefnogaeth ariannol yr ydych yn gymwys iddynt.
- Mae Parkinson’s UK yn darparu cefnogaeth wyneb yn wyneb ac ar-lein i’ch helpu chi a’ch anwylyd i fyw’n dda gyda Parkinson’s. Cysylltwch â’r tîm lleol ar 0844 225 3787.
- Mae’n bosibl y bydd Person Shaped Support (PSS) Cymru yn gallu trefnu cyfnod o seibiant i chi. Cysylltwch â’r tîm lleol ar 01745 828000.
- Gall Gofalwyr Ifanc WCD gynnig cymorth, cefnogaeth a seibiant i ofalwyr iau, gan roi amser iddynt brosesu pethau ac amser i ffwrdd o’r aelwyd.
Fel gofalwr, mae’n bosibl y byddwch yn gymwys am gefnogaeth gan Gyngor Bwrdeistref Sirol Conwy.
- Bydd y Tîm Un Pwynt Mynediad yn darganfod beth sy’n bwysig i chi a’ch cyfeirio at y gefnogaeth sydd ei hangen arnoch.
- Gall Teleofal Conwy gynnig tawelwch meddwl drwy fonitro codymau, gwella diogelwch eich cartref, neu hysbysu ein gwasanaeth monitro 24/7.
- Gall bod yn ofalwr fod yn gostus, felly ceisiwch gyngor o ran arian ac unrhyw fudd-daliadau yr ydych yn gymwys i’w derbyn gan eich Tîm Hawliau Lles lleol.
- Os ydych chi neu’r unigolyn yr ydych yn gofalu amdanynt yn cael trafferth cerdded, gwnewch gais am Fathodyn Glas i’w gwneud yn haws i chi fynd allan ac ymweld â llefydd.
Gweithiwr Cymdeithasol
Os oes gennych chi weithiwr cymdeithasol, mae modd cysylltu â nhw i drafod eich anghenion.
Os oes arnoch chi angen siarad â rhywun y tu allan i oriau swyddfa, cysylltwch â’n Tîm Dyletswydd mewn Argyfwng.
Angen siarad â ni?
Os ydych chi wedi archwilio’r llwybrau cefnogi yr ydym wedi’u hawgrymu ac yn teimlo bod arnoch chi angen trafod eich anghenion gyda ni, ffoniwch ni ar 0300 456 1111, efallai y byddwch yn gymwys am Asesiad Gofalwr.
Bydd aelod o staff yn cynnal yr asesiad yn eich cartref, a byddant yn gofyn cyfres o gwestiynau i chi am eich bywyd o ddydd i ddydd, pa gefnogaeth yr ydych yn ei derbyn eisoes, a pha gefnogaeth bellach sydd ei hangen arnoch. Bydd y wybodaeth yr ydych yn ei chyflwyno yn ein helpu i nodi a ydych yn ofalwr ac yn gymwys am gefnogaeth gennym ni.
Nid yw Asesiad Gofalwr yn golygu y byddwch yn derbyn gwasanaeth bob amser. Mae’n drafodaeth am yr hyn a allai weithio i chi fel teulu o amgylch eich cyfrifoldebau gofalu.
Cefnogwr Gofalwyr
Rôl y Cefnogwr Gofalwyr yw cynnal a chryfhau proffil gofalwyr yng Nghonwy, a hyrwyddo eu hanghenion o fewn blaenoriaethau corfforaethol a gwasanaethau’r Cyngor, i sicrhau eu bod yn derbyn cydnabyddiaeth briodol.
Y Cynghorydd Cheryl Carlisle yw’r Cefnogwr Gofalwyr ar hyn o bryd.